Nova de linkoristano.it
Intra de pagu tempus at a cumentzai su cuncursu de ideas po fai su cuntrasènniu de sa Consulta giòvunus de Crabas. Apustis de s'’assemblea costituenti de su 19 de cabudani passau, custu at a èssiri su primu àutu de s'assòtziu nàsciu immoi immoi.
Si boleus presentai a manera ufitziali, e seu siguru ca unu cuncursu po fai unu cuntrasènniu potzat essi sa manera giusta po si fai connòsciri e po interessai prus personis, acrarat su presidenti Giuseppe Sanna. Su cuncursu est po totus is chi tenint prexeri de pigai parti, sena lìmidi de edadi o residèntzia, ma tocat a arrespetai sa temàtica scioberada de is piciocus de sa consulta.
Pedeus difati chi in ònnia òpera sa realtadi giovanili siat acapiada a sa stòria e a sa curtura de sa bidda nosta, sighit Sanna, “circhendi de avalorai ambaduas is cosas. Teneus abisòngiu de prus de unu puntu de vista po àiri unu cuadru cumpletu de is chi sunt is interessus de is giòvunus de Crabas. S'ant a premiai s'originalidadi , sa creatividadi e su de àiri tzentrau sa chistioni”.
Sa valutatzioni s'at a fai a primu in is social, inui onniunu at a pòdiri scioberai s'òpera chi ddi praxit de prus cun unu like o unu parri. Intra de is òperas chi ant a arresultai prus agradèssias, sa Consulta at a scioberai sa chi at a binci.
“Acabbau su cuncursu”, sighit a nai su presidenti, eus a essi diaderus prontus a cumenztai cun is atividadis. Teneus bidea de fai progetus meda, chi boleus presentai a sa prossima assemblea, inui cumbidaus totu is giòvunus a pigai parti. Intra de is ideas chi si sunt benidas a conca, finas cussa de torrai a nou is ispàtzius dedicaus a is giòvunus. "