Ddi dexit in custas diis a ligi "S'urtima xena", una cummèdia a unu atu e tres tempus, in lìngua sarda, chi at scritu in su 1972 Antoni Garau grandu cummediògrafu de Aristanis (Aristanis, 03.06.1907-20.02.1988). Sa cummèdia est ambientada me in is annus cincuanta in una bidda e contat de Maria Zruabara, fiuda de Balloi Prammas, sordau arrutu e spèrdiu in gherra e de sa famillìa sua manna de 10 fillus. Totu fùrriat in tundu a su chi s'acostumàt de fai sa dii de Totu is Santus e sa Dii de is Mortus: is campanas addopiendi, is pipius de domu in domu po is ànimas de is mortus, is pabassinus e... sa mesa posta po fai cenai s'ànima de Balloi mortu. Ma chi mortu non fut.