Sa devotzioni manna de is crabarissus est cosa nodida e sa festa de Santa Maria Assunta Vìrgini, arrapresentat po sa comunidadi intrea unu momentu spirituali intèndiu meda.
Est duncas festa manna in Crabas de su 23 a su 25 de maju, candu prusatotu su 24 totu sa bidda si firmat po afestai Nostra Sennora. Tzertu, a oi is cosas sunt mudadas ma is usàntzias antigas abarrant ancora , prusatotu tra is bècius.
Totu cumentzat a primu meda de sa dì de sa santa, candu su presidenti e su comitau intreu comintzant a traballai po cuncordai sa festa manna.
Sa primu cosa de fai est agatai su dinai po fai sa festa, cun unas cantu initziativas cuncordads po s'ocasioni.
Sa circa si fait domu po domu in totu is bias de sa bidda. Si pigat totu non feti su dinai. Unu carru cuncordau a pinnoi cun muncandoris antigus, aratzus e arroba arricamada, tirau de unu giù de bois si movit in is bias de sa bidda. A acumpangiai su carru ddui sunt is sonadoris de “launeddas” chi cun sa mùsica issoru ndi scidant s'atentzioni de is tzitaduns e ddus incorant a èssiri de coru bonu.
Est su mangianu de su 24 de maju chi sa pratza de sa crèsia si prenit de genti de ònnia edadi chi abetat sa prufassioni chi inghitzat candu sa bandera de Maria benit giada a su bincidori de unu incantu (sa ditadura de sa pandera). Chi dda bincit , po impromitèntzia dda podit e depit portai a coddu in totu is eventus religiosus chi s'ant a fai in s'annu. Sa prufassioni sighit unu càminu chi andat in totu is bias de sa bidda po interessai totu sa comunidadi.