Sa lei 482 de su 99 arreconnoscit a sa scola sa tarea de avalorai totu is lìnguas e giai oportunidadis de formatzioni sèmpiri purs mannas, assigurendi su deretu de is chi faint parti de is minorias linguìsticas stòricas de imparai sa lìngua mama issoru.
In sa lei agataus normas spetzìficas po imparai is lìnguas de minoria me in is iscolas de is doxi comunidadis linguìsticas arreconnotas: comunidadis albanesas, catalanas, germànicas, grecas, slovenas e croatas e de cussas chi fueddant su frantzesu, su francu proventzali, su friulanu, su ladinu, s'ocitanu e su sardu.
Su rolu de sa scola
Sa scola cuncordat s'imparu de sa lìngua de minoria e esercitendi s'autonomia organizativa e didàtica e stabilessit comenti si depint fai is atividadis , ponendi in menti fintzas a is rechestas de is babbus e mammas. Issus difati, candu scrint is piciocheddus a scola, faint sciri chi bolint a ddis imparai sa lìngua de minoria.
In s'asilu est prevididu de podi imperai siat sa lìngua italiana siat sa lìngua de minoria po fai is atividadis.
In is iscolas elementaris e mèdias sa lìngua de minoria si podit imperai comenti a aina de imparu.
Is iscolas podint fintzas cuncordai cursus de formatzioni po sa genti manna e po is maistus.
Su Miur si òcupat de su pianu de is finanztiamentus po amparai e avalorai is lìnguas de minoria. Annu po annu si pùblicant is pianus de interventu e finantziamentu po cuncordai progetus natzionalis e localis chi pertocant su stùdiu de is lìnguas e de is tradiztionis culturalis chi faint parti de una minoria linguìstica. Is pianus cumbidant is dirigentis scolàsticus de is territòrius inui si àplicat s'amparu de is linguas de minoria a intregai progetus po duus annus (cunforma a s’artìculu 5 de sa lei 482 de su 1999).