Su Plus de Aristanis at publicau s'avisu pùblicu po scerai entis de su tertzu setori chi siant disponìbilis a fai Progetus de utilesa pùblica ( PUC) chi interessant is benefitziàrius de su rèditu de tzitadinàntzia. (RdC).
"Is PUC - narat s'Assessori a is servìtzius Sotzialis de Aristanis Carmen Murru - sunt dedicaus a is benefitziàrius de su rèditu de tzitadinàntzia , e tenint sa punna de cumbati s'escruidura sotziali dèpia a cosas meda, essendi duncas una ocasioni de crèscida po is benefitziàrius e po totu sa comunidadi".
Paris cun s'avisu si pùblicat s'elencu de is àmbitus inui fai is progetus utilosus a sa comunidadi e su nùmeru de is chi s'ant a interessai in custus progetus artìsticus, sotzialis, culturalis, ambientalis e de amparu de is benis de totus.
Is PUC podint pertocai siat una atividadi noba, sia su de afortiai una atividadi chi nc'est giai ma sunt traballus chi non si podint acostai a atividadis de traballu subordinau, parasubordinau o indipendenti.
Is PUC sunt cuncordaus e realizaus a manera assotziada in s'àmbitu PLUS de Aristanis.
Cun s'avisu si bolint scerai entis de su tertzu setori, assòtzius e coperativas sotzialis, organizatzionis de volontariau, assòtzius de promotzioni sotziali, impresas e fondatzionis, comenti ddas pretzisat su Còdixi de su tertzu setori e chi tenint sa sedi operativa in su territòriu de is comunus de su PLUS de Aristanis.
Tocat a mandai sa manifestatzioni de interessu cun posta eletrònica tzertificada a s'indiritzu istituzionale@pec.comune.oristano.it.
Po ndi sciri de prus podeis tzerriai a s'ufìtziu PLUS a is nùmerus 0783/791230-276-254 o sciri a s'indiritzu de posta eletrònica : poninclusione.fondopoverta@comune.oristano.it .