Un'àteru fueddu chi acostumaus a intendi a diis de oi candu unu chistionat in sardu est "otobri" o "otobre". Is nòminis de is mesis de s'annu funt sunfrendi sa strumpada chi ddis at donau s'italianu. Sa lìngua sarda tenit su fueddu suu o mellus prus de unu fueddu!
- "Santu Gavinu" o "Santu Aini" (mudat a logus sa manera de ddu pronuntziai) a logus apoderat su genitivu latinu casi ca in s'antigòriu si naràt: "natale sci. Gavini"; est duncas unu tèrmini de su latinu ecresiàsticu, sa festa de su santu arruit su 25 de su mesi;
- "mesi de ladàmini" o "mesi de ledàmini" (mudat a logus sa manera de ddu pronuntziai), ndi arribat de su latinu LAETAMEN, sendi su mesi po spaniai su ladàmini me in is terras;
- "Santu Miali" (mudat a logus sa manera de ddu pronuntziai), ndi arribat de s'aregu bizantinu, sa festa de su santu arruit su 29 de su mesi.
Is etimologias funt de su DES de M.L.Wagner.
I.A.