Is ufìtzius comunalis ant de pressi spriculau is istàntzias po sa cuncessioni de su bonu ìdricu de apretu chi funt arribadas aintru de su tèrmini po ddas intregai de su 15/10/2020.
Valutau finas ca a unu nùmeru mannu de dimandas ddis ammancant datus e/o documentus chi nci boliant po intrai a su benefìciu, su Comuni at decidiu ca is interessaus ant a podi intregai is aciuntas e perfetzionai is istàntzias aintru de su 30/10/2020.
A is tzitadinus chi ant intregau is istàntzias non cumpretas ddus at a cuntatai su servìtziu incarrigau po intregai is integratzionis etotu.
Po s'ammissioni a su benefìciu de su bonu ìdricu de apretu, segundu is critèrius de s'enti de Guvernu de s'àmbitu de Sardigna (EGAS) tocat de ai tentu contracorpus in s'arrèditu po nexi de is mesuras po non fai spaniai su virus Covid-19.
Me in is dimandas tocat a marolla de ddi auniri s'ISEE de immui (inditadori diferenti de su ISEE ordinàriu) po chi nci bolit un'atestau aposta de arrèditu chi lassat unu patronau, consulenti o tzentru de assistèntzia Fiscali (C.A.F.) de riferimentu.
Po tanti, s'invitant a totu is tzitadinus chi no ant auniu a s'istàntzia s'ISEE de immui a nci mandai s'atestau aintru de su 30/10/2020 e a s'incurai, in su matessi tempus, a integrai totu su chi ddis at fatu sciri s'ufìtziu incarrigau.
Po informus e crarimentus cuntatai su tel. 0783/79129