Is consonantis mudòngias
( Liau de "ARRÈGULAS PO ORTOGRAFIA, FONÈTICA, MORFOLOGIA E FUEDDÀRIU DE SA NORMA CAMPIDANESA DE SA LÌNGUA SARDA")
In Campidanu nci sunt unus cantu sonus de consonantis chi mudant candu s’agatant in conca de fueddu apustis de àteru fueddu chi acabat a vocali: po aguantai perou sa firmesa de sa grafia ddus scrieus sèmpiri comenti funt in su fueddu nau a solu.
Custus sonus funt sa C (siat palatali siat velari), sa F, sa P, sa S e sa T.
C palatali – In fueddus comenti /celu/, /cida/ su sonu est [tʃ], ma candu ddu naraus apustis de vocali, /su celu/ [su ʻʒelu], /sa cida/ [sa ʻʒiða], mudat a su sonu [ʒ] chi intendeus in su fueddu /paxi/ [ʻpaʒi].
C velari – In fueddus comenti /cani/, /coru/, /cùmburu/, /chini/ su sonu est [k], [ʻkani], [ʻkɔɾu], [ʻkuɱbuɾu], [ʻkini], ma candu ddu naraus apustis de vocali mudat a su sonu [ɣ], /su cani/ [su ʻɣani], /su coru/ [su ʻɣɔɾu], /su cùmburu/ [su ʻɣuɱbuɾu], /po chini/ [po ʻɣini], .
F – In is fueddus chi cumentzant a sonu [f], po amostu /fogu/ [ʻfoɣu], /funi/ [ʻfuni], /farta/ [ʻfarta], /fita/ [ʻfita], custu mudat a [v] candu ddu naraus apustis de vocali: /su fogu/ [su ʻvoɣu], /sa funi/ [sa ʻvuni], /sa farta/ [sa ʻvarta], /sa fita/ [sa ʻvita], comenti s’òmini intendit in su fueddu /càvuru/ [ʻkavuɾu].
P – In is fueddus chi cumentzant a sonu [p], po amostu /pani/ [ʻpani], /pisurci/ [piʻzurtʃi], /ponni/ [ʻpɔn:i], /pudda/ [ʻpuɖ:a], custu si fùrriat a [ß], candu est apustis de vocali: /su pani/ [su ʻßani], /su pisurci/ [su ßiʻzurtʃi], /po ponni/ [po ʻßɔn:i], /sa pudda/ [sa ʻßuɖ:a], comenti s’òmini intendit in su fueddu /abi/ [ʻaßi].
S – In is fueddus chi cumentzant a sonu [s], po amostu /sedda/ [ʻsɛɖ:a], /sinnu/ [ʻsin:u], /sonai/ [sɔʻnai], custu mudat a [z], candu est apustis de vocali: /sa sedda/ [sa ʻzɛɖ:a], /su sinnu/ [su ʻzin:u], /po sonai/ [po zɔʻnai], o in coa de fueddu candu ddu sighit vocali: /tempus/ [ʻteɱpuzu], /andas/ [ʻandaza], comenti s’òmini intendit in su fueddu /casu/ [ʻkazu].
T – In is fueddus chi cumentzant a sonu [t], po amostu /tèula/ [ʻteula], /tempus/ [ʻteɱpuzu], /totu/ [ʻtotu], custu mudat a [ð], candu est apustis de vocali: /sa tèula/ [sa ʻðeula], /su tempus/ [su ʻðeɱpuzu], /de totu/ [de ʻðotu], o in coa de fueddu candu ddu sighit vocali: /andat/ [ʻandaða], /papàt/ [paʻpa:ða], comenti s’òmini intendit in su fueddu /cadena/ [kaʻðɛna].