Si fait sciri ca in custas diis funt portendi me in domus is avisus de pagamentu TARI 2020 cun is iscadèntzias de pagamentu afatantis chi at aprovau su Consillu Comunali cun delìbera n. 28 de su 31.07.2020:
- sa 1 arrata: aintru de su 16 de su mesi de ladàmini de su 2020;
- sa de 2 arratas: aintru de su 1 de su mesi de idas de su 2020;
- sa de 3 arratas: aintru de su 16 de freàrgiu de su 2021;
- sa de 4 arratas: aintru de su 16 de abrili de su 2021;
- Pagamentu totu in una borta: aintru de su 16 de abrili de su 2021.
Acontessendi de no ai arriciu is modellus de pagamentu, fait a ndi pediri còpia inderetura me in s’Ufìtziu Tributus, po mesu de is cuntatus chi funt in bàsciu de sa pàgina.
Sceti po s’annu 2020, ant istituiu un’arrebàsciu asuba de sa cuota fissa e chi mudat de sa TARI 2020 po is impitus chi non funt de logu de domu chi ant suspèndiu in totu s’atividadi de traballu, po nexi de s’apretu epidemiològicu de COVID-19, cun custas maneras:
- s’arrebàsciu s’at a aplicai cunforma a is mesis de suspensioni efetiva obrigada de cussa atividadi aposta, foras de is localis chi funt a magasinu, a localis de dèpositu e sìmbilis;
- s’arrebàsciu s’at a podi aplicai a is impitus chi non funt de logu de domu, movendi de su còdixi ATECO e po totu su tempus de suspensioni efetiva obrigada, comenti est inditau me in is DPCM e me in is ordinàntzias chi at bogau in matèria sa Regioni Autònoma de Sardigna;
- is beneficiàrius chi ant a bolli gosai de s’agevolamentu, apustis de ai arriciu s’avisu de pagamentu TARI 2020, ndi ant a depi fai arrechesta cumpilendi modellu aposta chi lassat su Comunu (auniu a custa nova), po podi fai sa retìfica chi ddi pertocat in s’avisu de pagamentu arriciu;
- acontessendi de ai giai atèndiu a pagai sa TARI 2020, s’at a incurai de arrembursai sa cuota chi non si depit;
Custa arrechesta, firmada comenti si depit e aunida a unu documentu de identidadi de su chi decrarat, s’at a depi intregai a s’Ufìtziu Tributus de su Comunu de Santa Justa, aintru e sena de sartai su 30.06.2021, aici comenti ddu disponit su Regulamentu TARI, cun:
- intregu deretu a s’Ufìtziu protocollu de s’Enti;
- posta ordinària: tecnico.tributi@comune.santagiusta.or.it o info@comune.santagiusta.or.it ;
- posta eletrònica certificada: tecnico.tributi@pec.comune.santagiusta.or.it o protocollo@pec.comune.santagiusta.or.it .
Po cali si siat cosa a riguardu fait a cuntatai s’Ufìtziu Tributus, totu is mangianus de sa ora de is 11.00 a sa ora de is 2.00 de meigama e su mèrcuris de is 3.30 a is 6.30 de merii.
tel. 0783/354517 - e-mail: tecnico.tributi@comune.santagiusta.or.it - PEC: tecnico.tributi@pec.comune.santagiusta.or.it
Su Responsàbili de procedimentu est Geom. Giovanni Musinu.