Su territòtiu de Mòguru est arricu de testimònius archeològicus e duncas est su logu giustu po cuncordai calincuna bessida. In custa passillada chi eus pensau eis a pòdiri abbisitai totu is nuraxis e gosai de sa bellesa de custu logu.
Si partit de su nuragi connotu comenti a Su Guventu, e de inguni si sighit in su caminu nuràgicu de Siaxi fintzas a su cumplessu Nuraxi Nieddu frecuentau de s’òmini a partiri de su perìodu pùnicu; de inguni si podit biri s’arriu Mòguru cun padentis de ìxili e màchia mediterrànea. De innoi si sighit faci a su Nuraxi Arrùbiu, tzerriau aici po sa presèntzia de is lichenus
Sa passillada sighit fintzas a s’àrea de Puisteris inui in mesu a bìngias e terras si podint agatai incuededdus de perda crobina, testimònius de su passàgiu de s’òmini in sa tziviltadi de Ozieri.
De innoi si bidit su campidanu cun totu is biddas suas e su casteddu de Monreale fortesa antiga de is giugis de Arborea. Atesu si bint is montis de su Linas, de s’Arcuentu e si sighit cara a su Monti Nieddu, e a su stàinu de Marceddì fintzas a su gurfu de Aristanis.
Si sighit ancora fintzas a su santuàriu nuràgicu de Cuccurada chi cumbidat a fai unu pausu po sa pràngiu impari a is amigus de passillada.
Ma tocat a si movi poita unu fradixeddu pitiu est abetendi; est su Nuraxi de Mudegu. Ddu saludaus de pressi e si moveus cara a su Nuraxi die Arrazzu.
Ainantis de cumentzai s’artziada chi portat a is cardillonis de sa struvina comenti a ùrtimu arregallu si firmaus a castia sa bellesa de sa localidadi de Scarrebi, cun is giardinus suus, is matas de olia secularis e is mitzas. De inguni si pigat sa strada po torrai a domunu narendi “atras bortas cun salludi”!