Is palestras scolàsticas funt unu beni pùblicu e fatas sarvas is esigèntzias didàticas si depint poni a disponimentu de sa populatzioni finas po atividadis foras de sa scola.
Est sa positzioni chi ant espressau custu mangianu is rapresentantis de su Comuni e de sa Provìntzia a is dirigentis de is scolas tzitadinas de ònnia òrdini e gradu atobiaus apari in sa sea de sa Provìntzia po spriculai is problemàticas acapiadas a sa cuncessioni de is palestras a is sotziedadis sportivas, foras de s'oràriu de scola.
Impari a s'Amministradori Straordinàriu de sa Provìntzia Massimo Torrente, a is Assessoris a su Sport e a s'Istrutzioni Pùblica de su Comuni de Aristanis Maria Bonaria Zedda e Massimiliano Sanna, ddui fiant is dirigentis scolàsticus de is istitutus tzitadinus e su rapresentanti de s'Ufìtziu scolàsticu provintziali.
Is Assessoris Maria Bonaria Zedda e Massimiliano Sanna ant ammostau un'acinnu de protocollu de intesa chi arremonat arrègulas po is sotziediadis sportivas po impreai is palestras scolàsticas. Intra de is normas chi at propostu su Comunu: sa mesuratzioni de sa callentura a is atletas intrendi a is impiantus, arrègulas po s'abarrai atesu s'unu de s'àteru, limitai sa genti in intrada e in bessida, igienizai is manus.
Po sa chistioni de sanificai is struturas, su Comuni cun su protocollu de intesa ponit in contu ca funt is sotziedadis sportivas a s'assegurai de limpiai totu is diis is ambientis, is ainas manigiadas cun detersivus aposta po igienizai. Acontessendi de ddui at una personi positiva a su Covid-19 funt is sotziedadis etotu a si ndi pigai s'incàrrigu de sanificai segundu a is disponimentus de su Ministeru de sa Saludi.
Una mesura chi non bastat narant is dirigentis scolàsticus chi ant pediu de fai igienizai assumancu duas bortas a sa dii, una a mangianu a s'acabbu de is letzionis e una candu acabbant de impreai sa palestra is sotziedadis sportivas, ma prus de totu de ddu fai fai a una dita de pulitzia po certificai ca s'edifìtziu est igienizau. S'Amministradori straordinàriu de sa Provìntzia Massimo Torrente at ammostau “sa disponibilidadi de s'enti a s'aguantai su càrrigu econòmicu chi iant a teni is sotziedadis sportivas. Ma is palestras scolàsticas si depint poni a disponimentu de is sotziedadis arrispetendi totu is cunditzionis de seguresa".
“Candu nci at a ai unu protocollu chi firmant is sotziedadis sportivas e ddu arrispetant, finas is esigèntzias de is scolas s'ant a acuntentai assegurendi a totus seguresa prus manna" at aciuntu s'Assessori comunali a s'Istrutzioni Pùblica Massimiliano Sanna.
“Primu ancora de is sotziedadis sportivas e a is scolas, depeus puntai s'atentzioni nosta a is piciocheddus: funt cussus is chi currint s'arriscu de pagai in primu personi sa firmada de is atividadis - at postu a craru s'Assessora comunali a su Sport Maria Bonaria Zedda -. Cussus piciocus chi de meigama impreant is palestras funt is pròpius chi pagus oras prima ant frecuentau is letzionis, me in is àulas e me in is pròpias palestras".
“Abarraus a s'avèrtia – consillat forti s'Assessora Zedda -. Chi is sotziedadis sportivas si firmant si ndi pesat unu problema sotziali mannu".
De sa pròpia idea Salvatore Melis de s’Ufìtziu scolàsticu provintziali: "Iat a essi sciacu mannu sotziali. Chi si negant is palestras si firmant is atividadis, si firmant is campionaus e si proibbit s'atividadi sportiva a is piciocheddus".
De is dirigentis scolàsticus ndi est bessiu unu pensamentu malu asuba de sa responsabilidadi chi tenit de biri cun s'impreu de is impiantus de parti de sugetus diferentis de sa scola: "Ita iat a acontessi incapitendi cuntagiaus candu is sotziedadis sportivas impreant is impiantus? De chi est sa responsabilidadi? Is protocollus propostus non bastant a assegurai sa seguresa de is impiantus".