BONUS SOTZIALI: AUTOMÀTICU DE SU 2021
S'Autoridadi po regulamentai s’energia (ARERA) at comunicau ca su Bonu Sotziali s’at a lassai in automàticu movendi de su 2021 ponendi apari is datus me in is bancadatus de is entis incarrigaus.
Is Bonus funt Bonus Àcua, Luxi e Gas e ponint in contu un’arribàsciu asuba de is bulletas de is impitadoris. Custus tres Bonus ant a essi automàticus de su 1 de Gennàrgiu de su 2021 sena abisòngiu de fai dimanda o de pediri s’annoamentu.
A is tres Bonus si podit acostai su Bonus Elètricu po Disàgiu Fìsicu po is chi tenint prus abisòngiu de currenti po arraxonis mèdicas (alimentatzioni de is aparechiaduras).
Po teni deretu a is primu tres bonus tocat de essi in una cunditzioni de disàgiu econòmicu cun ISEE màssimu de € 8.265,00 (finas a € 20.000,00 candu su nùcleu familiari est assumancu de 4 personis), mentras po intrai a su bonu po disàgiu fìsicu tocat a pediri s'atestazioni ASL.
Su BONU ÌDRICU est un’arribàsciu carculau asuba de sa pròpia tarifa de s’àcua e ammantat su fabisòngiu de 50 lìtrus de àcua a sa dii. Si mandat inderetura cun sa bulleta a is impitadoris cun frunidura individuali e cun manera de pagai chi fait a traciai e apurai (acrèditu in su contu o assènniu circulari) a is impitadoris inderetus cun frunidura centralizada.
Su BONU LUXI rapresentat un’amenguamentu asuba de s’importu de sa bulleta de sa luxi e mudat cunforma a su nùcreu familiari. S’importu andat de € 125,00 po 2 personis, a € 148,00 po 3/4 personis e finas a € 173,00 po assumancu 4 personis.
Su BONU GAS ammènguat s’importu de pagai in sa bulleta de su gas e dipendit de su Comunu de residèntzia, de su nùmeru de is cumponentis de su nùcleu familiari e de sa destinatzioni de usu. Is impitadoris deretus ddu ant a aciapai in bulleta e cussus inderetus cun bonìficu.