Atacant, cida chi benit, in pratza de Roma, in Aristanis, is traballus de restàuru de sa Turri de Santu Cristòforu.
Su progetu de su Comuni de Aristanis pertocat is traballus de restàuru e a poni in seguresa sa campana e is solàrius de sa Turri medievali.
At a fai is traballus s’impresa “Archeo&Restauri” de Nàpuli chi at bintu sa gara de apaltu cun una oferta de 61 milla èurus. Su tempus carculau po fai is traballus est de 108 diis movendi de sa cunsinna chi est mèrcuris chi benit.
“S’apaltu, finantziau cun is fundus de s’8 po milli, at a podi torrai a fai gosai a sa genti de sa Turri de Santu Cristòfuru, unu de is sìmbulus identitàrius prus de importu de sa tzitadi” narant su Andrea Lutzu e s’Assessori a sa Cultura Massimiliano Sanna.
“S’inserru longu de sa turri fiat nexi de s’istadu de degradu de is solàrius chi me in is ùrtimus annus est andau in peus unu pagheddu – narant is Assessoris a is Traballus Pùblicus Francesco Pinna e a sa Cultura Massimiliano Sanna -Fiat arribau a su puntu chi non fadiat prus a aberri su monumentu in cunditzionis de seguresa. Su scònciu de is solàrius est peus manu manu chi si àmpuat a susu: mentras su primu livellu parrit magangiau po su prus po su ladàmini e speigus de picioni, e po su bremi de linna e àteru baballoti chi papat linna, cussu chi est in mesu a su primu e segundu pianu, in prus de su ladàmini est papau de baballoti, po su prus de fromiga de linna. Su de tres solàrius est totu magangiau, in prus de is baballotis arremonaus, po nexi de s’intrada de àcua chi ddu at pudriau o po finas chi ddi at spicigau partis lassendi a vista sa soleta de cimentu chi est asuba.”.
Su progetu de restàuru, chi Architetu Sara Fabbri at incurau, ponit in contu de limpiai e sanificai su ladàmini de is solàrius, de cambiai is solàrius e is struturas chi ddus apoderat, is scalas e is barandau, e de torrai a incroxai a carcina e terracota is palas intra de sa turrixedda e is marruleris.
Me in is diis passadas su Visu Sìndigu e Assessori a sa Cultura Massimiliano Sanna at atobiau is operadoris cummercialis chi traballant in pratza de Roma po ddis fai sciri de is traballus de cantieri.
“Is traballus po torrai sa Turri a su gosu de sa colletividadi si iant depi fai sena de ndi pesai strobbu meda a is atividadis cummercialis, ma chistionaus sèmpiri de unu traballu pùblicu e de unu cantieri cun operàius e mezus po chi abisòngiat a teni totus unu pagheddu de passièntzia” at postu a craru s’Assessori Sanna.
Su cantieri at a pinnicai is tres ladus de sa turri e duus ant a preni parti de sa pratza, lassendi, comenti si siat, su logu po fai passai sa genti a pei.
Sa passada de mezus po tragai materiali s’at a fai in unu passadissu, su tempus chi serbit, apustis tenta autorizatzioni de su Cumandu de Politzia Locali.