COMUNU DE MÒGURU
Domìnigu 25 e lunis 26 de ladàmini in 160 Comunus de sa Sardìnnia si votat po s’eletzioni de is Sìndigus e de is Consilleris comunalis.
Su Presidenti de sa Regioni difati, cun Decretu cosa suu n. 82 de su 28/08/2020, publicau in su Bolletinu Ufitziali de sa Regioni n. 52 de su 28/08/2020, at istituiu po su 25 e 26 de ladàmini 2020 sa dì po fai is consultatzionis eletoralis po eligi is Sìndigus e is Consillus Comunalis e po domìnigu 8 e lunis 9 de onnisanti sa data po fai unu ballotàgiu eventuali.
S’at a votai de is 7 a is 23.00 de domìnigu 25 de ladàmini e de is 7.00 a is 15.00 de lunis 26 de ladàmini. Po votai s’eletori depit ammostai a su presidenti de sègiu sa tèssera eletorali e unu documentu de arreconnoscimentu.
S’at a votai cun una scheda ùnica; a ònnia candidau sìndigu at a èssiri acostada sa lista de is eletoris chi ddu sustenint, candidaus a sa càrriga de consilleris. In sa scheda est giai scritu su nòmini de su candidau a sa càrriga de sìndigu e acanta su cuntrasènniu de sa lista sua.
Su votu po su Sìndigu e su Consillu sunt aunius: votai po su candidau sìndigu bolit nai giai sa preferèntzia a sa lista sua. Est Sìndigu su candidau chi pigat prus votus. Si acuntessiti ca is candidaus tenint su matessi nùmeru de votus si torrat a votai su segundu domìnigu afatanti. Custa borta puru, at a diventai Sìndigu su chi pigat prus votus. In casu de paridadi, si eligit su candidau prus bèciu.
Fatu su sìndigu, si fait su Consillu: a sa lista chi sustenit su Sìndigu andant is 2/3 de is sègius disponìbilis; is chi abarranr benint spartzius intra de is àteras listas.
Candidaus e programmas amministrativus
:
Sa Commissioni Eletorali Circondariali de Aristanis at aprovau tres listas de candidaus presentadas po is eletzionis in su Comunu de Mòguru. S’òrdini de numeratzioni dd’ant assortau su 30/09/2020.
Po ligi is programmas, tocat a intrai in su giassu de su Comunu.