Fintzas in Aristanis est arribau su momentu de sartai torra su cancellu de scola e intrai in classi.
Sa comunidadi scolàstica aristanesa torrat a cumentzai su caminu suu apustis de s'interrutzioni po s'emergèntzia de Coronavirus.
Is istudiantis torrant in àula in custu annu diversu meda e duncas boleus bàtiri is manus a totu is pipius e pipias, piciocus e piciocas chi torrant a si setzi me in is banchitus de scola.
In custus mesis eis aguantau sa mancàntzia de sa scola chi connosceis. si seis cunformaus cun responsabilidadi manna a sa situatzioni chi nd'est nàscia. A bosatrus duncas , a is famìllias e a totu su personali scolàsticu fadeus augùrius mannus, chi potzat èssiri diaderus unu inghitzu nou.
Seus sigurus ca at a èssiri comoventi a si torrai a biri in classi. Aici est stètiu po is asilus chi ant abertu pagu diis. Eis a dèpiri poderai sa distantzia de unu metru ma aintru a scola eis a èssiri siguramenti prus acanta de comenti fuais in domu me in is cidas passadas.
Totus depeus imparai a bivi in comunidadi cun libertadi ma cun responsabilidadi manna po is àterus, a cumentzai de is personas chi sunt prus acanta, a scola, cun is amigus in famìllia.
Sa siguresa depit dìventai sa cosa de prus importu, sèmpiri. Non tenit sensu difati èssiri sigurus in scola ma si ndi scaresci de is arrègulas de distantziamentu, de is mascareddas, de si limpiai is manus, candu besseus a foras. Tocat a s'arregordai sèmpiri de custas arrègulas; a s'intrada e bessida de scola, a sa firmada de su pullman, in ònnia logu.
Oi prus de sèmpiri sa saludi de onniunu dipendit de comenti si cumportaus totus. Depeus andai totus in sa matessi diretzioni. Su virus no est ancora sparèssiu, eus a èssiri trancuillus sceti candu ant a agatai su vacinu. Po custu speraus chi bosatrus giòvunus gràtzias a s'esperièntzia de is mesis passauss e agiudaus de is maistus e de totu su personali de scola, scidiais giai s'esèmpiu a is mannus chi incapitant de si distràiri.
Eus traballau meda impari a is iscolas po garantiri sa siguresa, e immoi is iscolas podint torrai a partiri in su respetu de is mesuras de cuntenimentu de su coronavirus. Su traballu nostu peroa no accabat innoi e bosatrus podeis fai afidametnu in nosu sèmpiri. Eus a afrontai custu caminu nou cun responsabilidadi manna e fidànsia in su beranu.
Augùrius mannus po s'annu scolàsticu nou.