Unu finantziamentu de 300 milla èurus in totu, funt destinaus a is Assòtziu sena punna
de lucru chi apant sa sea legali e operativa in Sardigna, chi faint atividadi de spetàculu a cuntatu cun su pùblicu me in is setoris de teatru, mùsica, danza, cun sa punna primària de spaniai,
sarvaguardai e donai balori a s'usu de sa lìngua e de sa cultura sarda, e is Fundatzionis chi favoressint in su setori de sa mùsica sa sarvaguàrdia e su valorisamentu de is cumposidoris
sardus.
“Est - aici narat assessori Biancareddu – una initziativa innovativa, chi ponit a
primori su valorisamentu de s'identidadi, de sa lìngua e cultura sarda gràtzias a organismus de su cumpartu de su spetàculu comenti a mezus de spaniadura e favoressimentu in totu su
territòriu regionali".
Is rechisius po is assòtzius sena punnas de lucru funt crarus. Sa norma ponit in contu
difatis chi tèngiant sa sea legali e operativa in Sardigna e chi a s'ora de intregai sa rechesta, apant fatu totu de sighida s'atividadi insoru, fatu assumancu cuìndixi eventus a s'annu, in sa
simana intra de su primu de gennàrgiu de su 2017 e su 29 de freàrgiu de su 2020, unu mìnimu de corantacincu rapresentatzionis e ai pagau, in su matessi tempus, cuntributus previdentzialis
assumancu po 1.500 diis de traballu.
Sèmpiri sceti po is assòtzius, su càrculu de su cuntributu at a depi teni contu
s'importu cuncèdiu cunforma a su volùmini de afàrius chi arresurtat me in is ùrtimus duus bilàncius aprovaus. Is progetus s'ant a spriculitai segundu a sa dii chi funt arribaus e finas a spaciai
su dinai a disponimentu. Si lassant a foras de su progetu totu is organismus chi, mancai tenendi is rechisius, ant tentu in su 2019 cuntributus o programmas annualis de finantziamentu de sa
Regioni po importus chi sartant is 60 milla èurus.