Torrendi a atacai is letzionis, in Aristanis torrat a inghitzai su servìtziu mensa scolàstica puru.
Su servìtziu movit su 28 de cabudanni po is scolas de s'infàntzia e su 5 de su mesi de ladàmini po is scolas primàrias.
"Sa spaniadura de su mandiari finas a totu cantu andat s'apretu sanidàriu po su Covid-19 e, comenti si siat, assumancu finas a su mesi de idas de su 2020, s'at a fai sestau a pratu ùnicu sigillau callenti impreendi pratus bio-cumpostàbilis e crosaus a pellìcula biodegradàbili, comenti stabiliu de acòrdiu cun sa ASSL de Aristanis e cun is dirigentis scolàsticus" ponit a craru s'assessori a s'Istrutzioni Pùblica Massimiliano Sanna.
Movendi de custu annu scolàsticu po gosai de su servìtziu mensa tocat a ddu prenotai e a ddu cunfirmai ònnia dii po mesu de sa apricatzioni "APP Simeal". Sa procedura noba fait a càmbiu in totu a cussa de intregai su billetu a paperi a su gestori de su servìtziu mensa. A su matessi tocat a fai sciri candu s'ammàncat de scola.
Po annotai su mandiari tocat a ddu fai ònnia dii aintru de is 9 oras e mesu de mangianu.
Totus is impitadoris si ddu depint fai annotai finas is chi funt esentaus de ddu pagai.
Su gestori de su servìtziu at a aprontai a sa dii is mandiaris cunforma a su tanti annotau. Is genitoris depint arrispetai comenti si depit su chi s'est pediu po podi cuncordai mellus su servìtziu e a ndi fai gosai beni a is pipius.
Si ponit a craru ca po gosai de su servìtziu e duncas po teni sa possibilidadi de si fai annotai su mandiari, tocat de pagai sa cuota de contributzioni chi si depit fai in antis cun su sistema "PAGOPA".