A cumentzai de custa coa de cida, su tzentru de sa tzitadi torrat a aberri a su tràficu.
Dd'at detzìdiu custu mengianu sa Giunta Lutzu sighendi sa proposta de s'Assessora a is atividadis produtivas Maria Bonaria Zedda. Est una detzisioni pigada po fuiri ocasionis de assembramentu po cumbati s'ispainadura de su Coronavirus.
“Si serrat duncas una fasi de sperimentatzioni detzìdia a s'inghitzu de s'istadiabi apustis de su lockdown, pa agiudai is atividadis econòmicas, paris cun àterus intreventus comenti a su de àiri giau su solu pùblicu a indonu – narant su Sìndigu Andrea Lutzu e s’Assessora Zedda -. Sa crèscida de is casus de COVID-19, in totu su Stadu, comenti in Sardìnnia, in provìntzia de Aristanis e in sa tzitadi etotu, si portat a ammanniai sa cautela. Po sa matessi arraxoni eus annuddau su cabudani aristanesu”.
“In custu momentu tocat a giai ancora prus atentzioni e pigai ònnia detzisioni chi agiudit a cuntrastai s'ispainadura de sa pandemia” acrarat su Sìndigu Lutzu.
“Su de àiri serrau su tràficu a fini de cida at giau arresultaus bellus ma non podeus cuai is dificultadis atobiadas – sighit s’Assessora Zedda -. No est stètiu sìmplitzi agatai unu puntu de ecuilìbriu intra de is esigèntzias de bar, ristorantis e pitzerias, e cussas de is àteras atividadis commertzialis, de is turistas e de is residentis. A s'acabbu de su lockdown at bintu su sentidu de responsabilidadi e su disìgiu de agiudai sa ripresa de s'economia. S'istadi est acabbada e podeus serrai custa sperimentztzioni tenendi contu de is apretus de is residentis e de is àterus esercìtzius commertzialis.
Po s'annu chi benit, sperendi chi custa emergèntzia sanitària passit, eus a tènniri tempus e manera de cumentzai unu dibàtitu cun is interessaus , fintzas cun is assòtzius de categoria, sèmpiri interessadas in is detzisionis chi pigaus , po cuncordai atzionis chi acuntentint totus”.