Informatzionis e fotografias liadas de linkoristano.it.
Sa scritura comenti a aina po mudai sa timoria in una ocasioni de crèscida.
"Nosu a su tempus de su coronavirus", est prus de unu giornali de scola. Est una arregorta de stòrias, sentidus, pensamentus e disènnius nàscius de sa fantasia e boxi de is istudiantis de sa scola mèdia de Biddobrana chi, agiudaus de sa maista issoru Liliana Contini, sunt arrannèscius a non si fai cuntagiai de sa timoria e de fai de una dificultadi una ocasioni po diventai prus scìpius e prus responsàbilis cara a issus etotu e a is àterus”.
Est unu progetu cuncordau de totu cussus piciocheddus chi at imperau s'arti de sa resilièntzia cun s'idea de fai de custu incueddu de stòria unu esèmpiu de impìnniu sotziali e de tziviltadi”.
Totu su traballu chi si podit ligi on line, dd'ant fatu in sa simana de su “lockdown”, in is diis de sa didàtica a distàntzia, inui si podiat abarrai acanta a is àterus feti cun su telèfunu. Is pàginas de su giornali de scola dedicadas a su lockdown sunt su testimòniu de comenti is istudiantis ant sodigau punnas didàticas de importu mancai sa simana longa de carantena, gràtzias a is atividadis cuncordadas de is maistus.
Mancai serraus in domu duncas, is piciocheddus ant ammostau interessu, impìnniu e partecipatzioni e gràtzias a su de ai partziu is traballus fatus, est stètiu possìbili fai su traballu "Nosu a su tempus de su coronavirus".
Paris cun is istudiantis ant agiudau a fai custu progetu is maistus, is bidellas, is babbus e mammas e prusatotu su professori Massimiliano Sechi e is professoressas Stefania Abis, Arianna Mereu, Gianna Faedda, Laura Vidili, Tina Minnei, Roberta Mereu, Daniela Finocchio, Monica Havasi e Pamela Secci.