Biddobrana – Stemma e stendartu
Su stendartu de sa bidda ddu ant fatu connosci a manera ufitziali a sa populatzioni su 5 de martzu de su 2006, in ocasioni de sa festa patronali de Santa Margaida e aprofitendi de sa prucessioni religiosa ddu ant aparau in oru de is bias de sa bidda.
Su stemma ufitziali propostu comenti a sìmbulu de sa bidda, apustis ai passau tempus po fai circas e stùdius, po ddu fai ammiti in s’aràldica ufitziali de is Comunus de Itàlia, at passau s’esàmini severu de s’Ufìtziu de su Stendartu de su Ministeru de s’Internu arricendi s’aprovamentu cun decretu de su Presidenti de sa Repùblica datau 28 de trèullas de su 2005.
Si chistionat de su scudetu connotu, totu a isfundu grogu, chi portat in artu sa corona tìpica de sa “civitas” antiga, cussa chi scerat is caràteris de Comunu e Tzitadi e in bàsciu is diademas intriciadas de lauberu e suèrgiu, sìmbulus de sa Repùblica.
A intru, is tres disènnius chi marcant su territòriu: a parti de susu in duus cuadrus diferentis, un’olia seculari e una màniga de seti spigas testimonia de su raportu de sa bidda cun sa terra, de su saliori suu e po su prus de sa capassidadi produtiva locali marcada po s’apuntu de ollu e pani, po chi sa tipicidadi de Biddobrana dda arreconnoscint finas a livellu natzionali.
A parti de bàsciu sa stilizatzioni de Santu Crispu a cuaddu, arregordau e a una parti venerau de sa comunidadi, ma sìmbulu de su frùmini chi atraessat su territòriu biddobranesu. A fai su stùdiu de su stendartu duus piciocus de su logu: Robert Dessì e su studiosu Roberto Zucca.
(Furriadura de su giassu istitutzionali setzioni Cultura e Turismu)