Cenàbura a merì in s'Auditòrium de su Tzentru Polivalenti de bia Tharros, arrespetendi is normas anticovid, si sunt atobiaus, comenti a onni annu, is babbus e mammas de is pipieddus chi frecuentant s'asilu nidu comunali e sa cooperativa chi si òcupat de su servìtziu, a sa presèntzia de s'Assessora a is polìticas sotzialis, assistentzialis e sanitàrias, Alessandra Spanu.
S'atòbiu est serbiu a giai a is genitoris is informatzionis po torrai a aberri s'asilu in siguresa, donendi scedas a is domandas fatas de is babbus e mammas.
“Non si podit fai a mancu in sa comunidadi nosta de is servitzius dedicaus a sa primu infàntzia, po amparai su traballu de is mammas e po conciliai sa vida e su traballu. Duncas eus ritènniu de non podi non torrai a aberri su nidu”, narat su Sìndigu, Andrea Abis.
S'Assessora Alessandra Spanu, aciungit: “S'Amministratzioni cunsiderat de importu mannu torrai a partiri cun is atividadis educativas, scidendi ca is pipius tenint abisòngiu de bivi situatzionis de normalidadi e de abarrai impari a is àterus pipius. S'asilu at a torrai a aberri gràtzias prusatotu a su traballu mannu fatu in custas cidas de is servìtzius sotzialis e de sa cooperativa chi cun professionalidadi si òcupat de s'asilu nidu comunali”.