Ant a cumentzai in tempus diversus is iscolas de Aristanis; s'asilu torrat a aberri su 23 de cabudani, mentras su 28 ant a inghitzai is iscolas elementaris e mèdias.
Sa detzididura chi at a èssiri scrita in una ordinàntzia sindacali, dd'ant pigada in unu atòbiu cunvocau de su Sìndigu Andrea Lutzu e de s’Assessori a sa Pùblica istrutzioni de su Comuni de Aristanis Massimiliano Sanna e inui ant presentziau is dirigentis scolàsticus, is rapresentantis de sa Prefetura e de s’Ufìtziu scolàsticu regionali e is sindacaus de sa scola.
“Su provedimentu dd'ant pigau totu is interessaus; s'Ufìtziu scolàsticu at pretzisau ca, sighendi is esigèntzias de su Comunu, tocat a fai de totu po arrespetai su calendàriu scolàsticu regionali chi previdit 200 diis de letzioni – acrarant su Sìndigu Andrea Lutzu e s’Assessori Massimiliano Sanna -. Eus pediu de incumentzai is iscolas in datas diversas po tènniri contu de is esigèntzias de totu is iscolas e totus sunt stètius de acòrdiu. Si cumentzat duncas su 23 de cabudani cun s'asilu ( po is pipius de 3 a 6 annus) , ca is iscolas sunt giai prontas po torrai a aberri; e si sighit cun is iscolas mèdias e elementaris chi ant a aberri a s'acabbu de su referendum , poita serbit su tempus po limpiai e sanificai su logu e pònniri a postu is ispàtzius”.
“In custus mesisi paris cun is dirigentis scolàsticus eus fatu unu traballu pretzisu e de importu mannu - sighint a nai su Sìndigu Lutzu e s’Assessori Sanna -. Nc'est stètia grandu collaboratzioni e volontadi de arresolvi ònnia problema po assigurai de cumentzai sa scola arrespetendi is protocollus e po fai inghitzai fintzas is servìtzius essentzialis comenti a su trasportu e a sa mensa”.