In ocasioni de sa consultatzioni referendària de su 20 e 21 de cabudanni, su Servìtziu de Igieni e Sanidadi Pùblica de sa Ats-Assl de Aristanis at aprontau unu pianu po aberri, in prus de sa sòlita ora, is ambulatòrius prus de importu de Igieni Pùblica de sa provìntzia in sa dii de domigu 20 de cabudanni, innui si podint peliai is certificatzionis de "impedimentu fìsicu a votai".
A ndi teni deretu funt is personis chi tenit s'abisòngiu de un'acumpangiadori po intrai a sa cabina: a is tzurpus, a is chi ddis ant segau una manu, a is chi ddis est calau paràlisi o àterus fertus de impedimentu sìmbili.
Is ambulatòrius de Igieni Pùblica chi ant a aberri domigu 20 de cabudanni funt custus:
Abas, in sa bia de IV Novembre, n.30, de is 9 oras a is 11 de mangianu;
Bosa, in sa bia Amsicora, n.1, de is 8.30 a is 10.30 de mangianu;
Bilartzi, in pratza S. Palmerio, n.1, de is 8 a is 10 de mangianu;
Aristanis, in sa bia Carducci, n.35, de is 9 oras a is 11 de mangianu;
Samugheo, in sa bia della Pace n.46, de is 10 a is mesudii;
Terraba, in sa bia Rio Mogoro, de is 9 oras a is 11 de mangianu.
In prus de sa dii de domigu 20 de cabudanni, sa certificatzioni s'at a podi peliai finas me in is diis in antis a sa consultatzioni referendària o in sa dii de lunis 21, me in su sòlitu oràriu de abertura de is ambulatòrius.
Po arriciri su certificau, tocat a ammostai in s'ambulatòriu de Igieni Pùblica de riferimentu unu documentu de arreconnoscimentu bàllidu e totu sa certificatzioni sanidària chi ndi atestat s'impedimentu fìsicu.