Sa fotografia e is informatzionis sunt liadas de linkoristano.it
Pidigheddu, est unu personàgiu pensau (e donau a su Comunu) de s'architeta Laura Falchi chi at pigau parti, s'annu passau, a su progetu de Servìtziu Tzivili a Sabarussa. Su pipiu de su nuraxi e is venturas cosa suas sunt parti de su progetu de divulgamentu de su nuraxi. Pidigheddu pigat su nòmini de su nuraxi Pidighi”, narat su Sìndigu Mario Tendas, “e serbit po agiudai is piciocheddus a connòsciri s'importu stòricu de su parchu archeològicu de sa bidda. ”.
“Eus pensau a imperai unu fumetu po interessai cantu prus podeus is giòvunus e fai sa chistioni prus ermosa, acrarat su sìndigu.
Pidigheddu – sighendi s'arrastu de Othok, personàgiu ideau de su Comunu de Santa Justa – dd'eis a agatai fintzas in is fraschitus de ingolli a scola e in sa ghia pitichedda cuncordada de is volontàrius de su Servìtziu Tzivili s'annu passau.
Su Comunu de Sabarussa duncas parat ancora a s'avaloramentu de su nuraxi Pidighi, gràtzias a unu contributu de 120.000 èurus giaus de sa Soprintendèntzia archeològica de Casteddu. Custu agiudu econòmicu - unu de is prus mannus tentus finas a immoi de is comunus sardus- at a permìtiri de sighiri is traballus po mellorai e fai prus bellu su parcu archeològicu e cuncordai unu progetu de promotzioni turìstica.