Su Comunu de Siamajore at deliberau de aprovai su schema de cunventzioni cun s'Unioni de is Comunus Fenìcius po cuncordai sa manera de fai su servìtziu de Sportellu de sa Lìngua Sarda e is laboratòrius linguìsticus.
Sa RAS cun Determinatzioni N.1041 protocollu n. 13460 de su 03/08/2020 de sa Diretzioni Generali de is Benis Culturalis, Informatzioni, Spetàculu e Sport at aprovau sa cuntzessioni de cuntributus po 25 Entis (Unioni de is Comunus Fenìcius puru) po is progetus de amparu de sa lìngua de minoria, Annualidadi 2020.
Su servìtziu s'at a fai paris cun is comunus de Prammas, Santa Justa, Biddobrana, Sabarussa.
Cali sunt is punnas de su progetu?
- melliorai sa cumpetèntzia linguìstica de is chi fueddant su sardu;
- ammanniai s'importu de su sardu me in is comunidadis intereassadas de su progetu;
- sighiri a tramandai sa lìngua sarda de generatzioni in generatzioni;
- acresciri s'alfabetizatzioni, siat cussa imparada cun cursus dedicaus, siat cussa imparada de sei, chistionendi cun is àterus.
Su Sportellu at a sighiri po 48 cidas, po unu annu intreu. At a abarrai abertu prus o mancu 16 oras a sa cida, spartzidas in 3 diis. Sa sedi at a èssiri in s'Unioni de is Comunus, ma is operadoris s'ant a podi trantziri me is is àterus comunus si ddu at a èssiri abisòngiu.
Po su chi pertocat is laboratòrius culturalis, is sedis ddas at a definiri s'assemblea de is sìndigus.