Artìculu e fotografia pigaus de linkoristano.it.
Stòria, cultura e valori identitàriu. Su 4 de cabudani in Santa Justa ant tzelebrau unu momentu stòricu de grandu importu po sa tzitadi e sa Crèsia sarda cun una òpera in ceràmica chi arregordat su Cuncìliu de su 1226. S'òpera dd'ant fata tres maistus localis de s'arti de sa ceràmica Adriana Baschieri, Stefano Merli e Paolo Argiolas, e s'agatat a s'intrada de su comunu in via Giovanni XXIII, acanta a su tzentru polivalenti chi arricit sa biblioteca comunali.
Custu pannellu s'aciungit a is àteras duas òperas de is annus passaus, fatas sèmpiri cun sa punna de avalorai sa cultura, sa stòria e su turismu de Santa Justa: sa primu òpera est intregada a sa genti arrùbia po ammostai su patrimòniu naturalìsticu de sa bidda, sa segundu òpera ammostat su pòpulu de su mari po arromonai ca Santa Justa est stètia unu tzentru marìtimu de importu po is popolatzionis antigas de su Mediterràneu.
In cussu Cuncìliu is mussennoris sardus si fuant atobiaus po scriri unu còdixi de importu mannu.
Est una òpera longa 12 metrus e arta 3; sa parti de mesu est dedicada a cussa chi oi est sa basìlica de Santa Justa: sunt afiguraus is mussennoris e su delegau de su papa. Is àteras partis ammostant su cuntestu sotziali ; fèminas in costùmini de cetus sotzialis diversus a manu manca, mentras a manu dereta agataus is òminis.