Torrat a cumentzai su 23 de cabudani a is 15.30 su tziclu de webinar pensaus po agiudai is impresas de su turismu a afrontai cun ainas nobas e cuncretas sa crisi chi sunt bivendi po mori de su covid 19.
S’initziativa est de sa Càmera de Cummèrtziu de Tatari, in collaboratzioni cun is Càmeras de Cummèrtziu de Casteddu, Nùgoro e Aristanis e cun s'agiudu de su ISNART- Istitutu Natzionali Circas Turìsticas. Asuta agatais is datas e is argumentus de is seminàrius chi s'ant a fai in is mesis de cabudani e ladàmini:
- Su segundu webinar si narat "COMENTI MELLORAI SA RELATA INTRA DE TURISMU E SU WEB PO NON PERDI SU CUNTATU CUN IS CLIENTIS E NDI ARRANGUITZAI ATRUS" e s'at a fai su 23 de cabudani a is 15:30.
- Su de tres webinar si narat "COMENTI AUNIRI CALIDADI E SIGURESA PO IS ESIGENTZIAS DE SU TURISMU BENIDORI: S'OSPITALIDADI ITALIANA, s'at a fai su 30 de cabudani a is 15:30.
- Su de cuàturu webinar est "COMENTI IMPERAI S'ATZESSIBILIDADI PO GARANTIRI S'ARRICIDA PO TOTUS E ARRIBAI A TENNI CUOTAS DE MERCAU NOBAS, e at a èssiri su 7 de su mesi de ladàmini a is 15:30.
- S'ùrtimu webinar si narat "COMENTI ATIVAI FAINAS IN SU TURISMU CHI ARRESPETINT S'AMBIENTI PO SMENGUAI IS COSTUS E DIVENTAI PRUS BELLUS PO IS CLIENTIS" , e s'at a fai su 14 de su mesi de ladàmini a cumentzai de is 15:30.
In is atòbius s'at a fueddai de temàticas de custus tempus; duncas de comenti afrontai sa crisi, de comenti torrai a pensai sa manera de bendi s'oferta turìstica, de comenti garantiri sa siguresa
a is clientis senza perdi sa calidadi de is servìtzius e comenti imperai beni sa comunicatzioni.
A s'acabbu de ònnia web cunferèntzia ddu at a èssiri su Question Time, unu momentu a disponimentu de is chi pigant parti po arriciri acraramentus e soluztionis apitzus de argunas problemàticas
chi ndi sunt benidas de custa crisi.
Po pigai parti a is atòbius tocat a si scriri, intrendi in su giassu de sa Càmera de Cummèrtziu inui agatais scritu comenti si arregistrai e is arrègulas de comenti si faint is cunferèntzias.