Sa Giunta Regionali at aprovau su pranu de interventus po agiudai s'intrada a is servìtzius po sa primu infàntzia cun s'abatimentu de sa cuota po sa frecuèntzia in nius e micronius pùblicus e privaus comporaus in cunventzioni de su Comunu (mesura "Nius a indonu"), po agiudai a is famìllia ponendi de acòrdiu famìllia-traballu. Sceti po su tempus de inserru po s'apretu sanidàriu de is servìtzius e finas a torrai a aberri comenti a sèmpiri is nius e is micronius aici comenti ant dispostu is autoridadis de cumpetèntzia, si ponit in contu finas s'intrada me in centrus de istadi 0-3 annus, autorizaus cunforma a sa normativa de immui e rispetendi is disponimentus natzionalis e regionalis po andai contras e preveniri sa spaniadura epidemiològica de Covid-19.
Su "Bonu nius a indonu" in sustàntzia est unu cuntributu de non prus de èurus 205,65 a su mesi, non prus de 8 mesis, in riferimentu a is servìtzius gosaus in su tempus intra de su 01.01.2020 e su 31.12.2020.
Su cuntributu etotu est mesurau cunforma a tres scallionis ISEE diferentis e tenit sa punna de cuntribuiri a s'abatimentu de is cuotas, aciungendi-sì a su "bonu niu" de s'INPS.
S’interventu non barrancat àteras mesuras de agiudu po cunciliai traballu-famìllia (po nai servìtzius po castiai pipius allenus e sighendi) e si podit pedit a cada unu minori de su nùcreu asuta de is tres annus de edadi.
Is tèrminis po intregai sa dimanda ddus ant torraus a aberri, po tanti cussa etotu s'at a podi intregai aintru de mesudii de sa dii 24 de cabudanni de su 2020, impreendi sa modulìstica aposta.