COMUNU DE MÒGURU
Indicus po is eletoris chi sunt foras de Stadu
Cun Decretu de su Presidenti de sa Repùblica de su 17 de argiolas 2020, publicau in sa G.U. de su 18/07/2020, est cunvocau su referendum popolari cunfirmativu chi pedit:
“Aprovais su testu de lei costitutzionali chi pertocat “Mudaduras a is artt. 56, 57 e 59 de sa Costitutzioni in matèria de minimòngiu de su nùmeru de is parlamentaris”, aprovau de su Parlamentu e publicau in sa Gazeta Ufitziali de sa Repùblica italiana n. 240 de su 12 de su mesi de ladàmini 2019? “.
Is operatzionis de votu s’at a a acumpriri su 20 de cabudani de is 7.00 a is 23.00, e su lunis 21 de cabudani de is 7.00 a is 15.00. A partiri de is 15 de su lunis s’at a fai su scrutìniu chi pertocat su referendum costitutzionali.
Po cuntènniri su contàgiu de COVID-19 is operatzionis de votu s’ant a fai arrespetendi is protocollus sanitàrius e de siguresa inditaus de su Guvernu. Po àterus acraramentus si podit ligi Eligendo in su situ de su Ministeru de s’Internu.
Is eletoris chi ant a andai a votai in su comunu de residèntzia issoru ant a gosai de is agiudus po su viàgiu aplicaus de entis o sotziedadis chi si òcupant de is servìtzius de trasportu, comenti acrarau in sa tzirculari n. 25 de s’Ufìtziu territoriali de su Guvernu de Aristanis.
Eletoris chi sunt foras de s’Itàlia e votu in Itàlia.
Is eletoris italianus chi sunt foras de stadu, sighendi sa lei 27 de su mesi de idas 2001, n. 459 e su regulamentu de atuatzioni aprovau cun D.P.R. 2 de abrili 2003, n. 104, votant po corrispondèntzia.
Custa normativa permitit peroa de votai in Itàlia.
In custu casu spetzìficu su deretu de seberai de votai in Itàlia, comenti in is artt. 1, comma 3, e 4 de sa lei n. 459/2001 e de s’art. 4 de su D.P.R. n. 104/2003, si depit esertzitai intra de sa de dexi diis afatanti a sa cunvoca de su referendum e duncas intra de su 28 de argiolas 2020.
Custu seberu depit arribai a s’Ufìtziu consolari po territòriu.
Eletoris chi s’agatant foras de stadu a manera temporànea.
Is eletoris chi po traballu, stùdiu o rexonis de saludi s’agatant foras de s’Itàlia po una simana de asumancu tres mesis e in cussu interis arruit sa data de is eletzionis , ant a podi pigai parti a su votu po corrispondèntzia cuncordau de is ufìtzius consolaris italianus (lei 459 de su 27 de su mesi de idas 2001, comma 1 de s’art. 4-bis), arricendi sa scheda a s’indiritzu issoru in su stadu inui bivint.
Po pigai parti a is operatzionis de votu custus eletoris depint mandai intra de su 19 de austu 2020 a su Comunu de iscritzioni in is listas eletoralis su seberu issoru imperendi su mòdulu dedicau. A custa decraratzioni si depit alliongiai una còpia de su documentu de identidadi vàlidu.
Po àteras informatzionis si podit tzerriai s’Ufìtziu Eletorali de su Comunu de Mòguru (0783 993006).
Posta eletrònica ordinària: protocollo@comune.mogoro.or.it
PEC: protocollo@pec.comune.mogoro.or.it