Domigu 25 e lunis 26 de su mesi de ladàmini in 160 Comunus de Sardigna s'at a votai po s'eletzioni dereta de is Sìndigus e de is Consillus Comunalis.
Su Presidenti de sa Regioni, difatis, cun Decretu suu n. 82 de su 28/08/2020, publicau in su Bulletinu Ufitziali de sa Regioni n. 52 de su 28/08/2020, at fissau po is diis 25 e 26 de su mesi de ladàmini de su 2020 sa data po fai is consultatzionis po s'eletzioni dereta de is Sìndigus e de is Consillus comunalis me in is comunus chi depint annoai is òrganus arremonaus in s'annu 2020 e po domigu 8 e lunis 9 de onniasanti de su 2020 sa data, serbendi, po su turnu de ballotàgiu.
Is operatzioni de votu s'ant a fai de sa ora de is 7 de mangianu finas a is 11 de noti de domigu 25 de su mesi de ladàmini e de is 7 de mangianu finas a is 3 de meigama de lunis 26 de su mesi de ladàmini.
S'eletori, po votai, depit ammostai a su presidenti de sègiu sa tèssera eletorali personali e unu documentu de arreconnoscimentu.
Su votu po su Sìndigu e cussu po su Consillu funt aunius: votai po unu candidau a Sìndigu bolit nai a donai una preferèntzia a sa lista chi ddu acotzat.
Si eligit a Sìndigu su candidau chi otenit su nùmeru de votus prus mannu.
Acontessendi de arribai paris is duus candidaus s'at a torrai a votai (ballotàgiu) po custus ùrtimu duus sa segundu domigu afatanti. Finas in cussa ocasioni ndi at a bessiri elìgiu su chi at otentu prus votus. Acontessendi tambeni de arribai paris un'àtera borta s'at a decrarai elìgiu su prus antzianu. S'at a votai cun una scheda feti po eligi siat su Sìndigu siat su Consillu Comunali.
Totu is candidaus a sa càrriga de Sìndigu ant a essi acostaus a sa lista eletorali chi ddus acotzat, fata de candidaus a sa càrriga de consilleri. In sa scheda est giai imprentau su nòmini de su candidau a Sìndigu, cun, acanta a ònnia candidau, su cuntrasinnu de sa lista chi ddu acotzat. Una borta elìgiu su Sìndigu s'at a crariri finas su Consillu: a sa lista chi acotzat a su Sìndigu elìgiu ant a andai is 2/3 de is sègius a disponimentu, mentras is sègius chi abarrant s'ant a spratziri a manera proportzionali intra de is àteras listas.
Po ndi sciri de prus tocat a pregonatai a s'ufìtziu eletorali de su Comuni de Mòguru (tel. 0783-993006)