Su 25 de austu de su 1970 morriat Carlo Contini, s'artista aristanesu de prus importu de su ’900.
“A 50 annus de sa morti, boleus arremonai custa figura de importu mannu po sa cultura nosta e marcai su valori artistìcu de sa produtzioni sua, chi arrapresentat unu scrusòrgiu chi non si podit stimai po sa tzitadi de Aristanis e po sa Sardìnnia intrea"- ant nau su Sìndigu e Presidenti de sa Fundatzioni Aristanis Andrea Lutzu e s’Assessori a sa Cultura de su Comunu de Aristanis Massimilianu Sanna.
“Su patrimòniu de òperas, traballu e connoscèntzia depit èssiri amparau e tramandau – sighit a nai s’Assessori Sanna -. Po custa arrexoni eus a fai una mosta chi nd'at a tzelebrai s'òpera e at a cumentzai in su mesi de onnisanti, In prus s'amministratzioni comunali impari a is fillus de s'artista, Carla e Valèriu, cun s'agiudu de sa Fundatzioni Aristanis sunt traballendi po cuncordai unu tzentru de Documentatzioni e Archìviu chi pertocat Carlo Contini, e chi at a giai una manu de agiudu po ndi spainai sa figura e s’òpera”.
Su protzessu giai cumentzau cun sa donatzioni a su Comunu de tres òperas de valori mannu dae s'aredeu e cun s'òpera de su Tzentru de Documentatzioni chi est nascendi, at a permìtiri sa nàscida de unu museu artistìcu e biogràficu de Carlo Contini, chi at a assigurai s'amparu , s'avaloramentu e at a ammostai a su pùblicu sa stòria e is òperas suas.