IS PRUDUTUS TìPICUS. Prammas tenit unus cantu prudutus tìpicus gràtzias a su de àiri torrau a scoberri atividadis traditzionalis antigas comenti a s'artesania. Arregordaus is arricamus “a teba segada” o a “trama tirada”. po fai a manu sa camisa sarda antiga. Una àtera resursa de importu mannu est s'arti de fai scarteddus, ispainada meda gratzias a sa presèntzia de materialis comenti a su cardilloni e su crucùriu. .
S'ARTI DE COXINAI. Arregordaus su “Pani fatu in domu” , su “casigiolu” e su binu arrùbiu, intra de is cosas de prus importu de s'arti de coxinai de Prammas. E ancora is malloreddus, s'angioni, su porceddu arrustiu, chi agataus in àteras bidads. Una crosidadi, comenti arregordat Vittorio Angius, para e scirtori de Casteddu, narat ca in unu tempus candu s'àcua fiat mala, sa sola cosa chi si podiat bufai de bellu, fiat su binu. .
FESTAS E SAGRAS. Sa festa manna de Prammas est Santu Antoni chi est fintzas su patronu de sa bidda e s'afestat cuindixi diis apustis de Pasca manna e est intèndia meda de totu is prammaresus. Po sa festa in sa bidda si cuncordat unu grandu foghilloni chi s'alluit su vèspuru de sa festa etotu. Unu àteru apuntamentu de importu est sa prufassioni cun is carrus de linna cuncordaus a festa. In is tempus passaus po custa festa si fadiat una cursa de cuaddus connota comenti a “Su Pannu” inui is cuadderis fadiant giogus de arriscu atrivius. Custa manifestatzioni torrat a bivi fintzas a dì de oi cun is “Parìllias prammaresas”. Una àtera festa est cussa de Santu Antiogu, mentras in Tiria, fratzioni de Prammas, s'afestat Nostra Sennora de is Gràtzias.