S'Assessorau Regionali de su Traballu at publicau s'avisu po sa cuncessioni de agiudus
po agiudai s'economia po nexi de s'apretu sanitàriu Covid-19, a favori de impresas micrus e pitias contendi finas is traballadoris autònomus, ponendi in pràtica s'artìculu 12 commas 1 e 2 de sa
Lei Regionali n.22 de su 23 de su mesi de argiolas de su 2020.
S’interventu ponit in contu sa cuncessioni de agiudus deretus in contu de ocupatzioni a
favori de is sugetus afatantis:
- sugetus chi traballant in logu de editoria librària;
- benditoris ambulantis e giostràius;
- operadoris de su setori spetàculus a cuntatu cun su pùblicu, teatru, mùsica, danza,
contendi is professionistas e tècnicus audiovisivus, cìnema, discoteca e discopub;
- operadoris de agentzias de viàgiu.
Is agiudus s'ant a donai segundu a una procedura "a spertellu" e ant a mudai, cunforma a
su nùmeru de is traballadoris e de is efetivus in servìtziu, de unu mìnimu de 2.000 èurus a unu màssimu de 3.000 èurus.
Is dimandas si podint intregai movendi de is 9 oras de mangianu de su 10 de cabudanni de
su 2020 e finas a is 11.59 de merii de su 30 de cabudanni de su 2020, sceti impreendi s'apricativu chi est a disponimentu de sa Regioni Autònoma de Sardigna in s'àmbitu de su Sistema Informativu
de su Traballu e de sa Formatzioni Professionali (SIL) a s'indiritzu:
www.sardegnalavoro.it