Po podi fai is tamponis a manera lesta e a totu is citadinus, in mesu a totu a is chi ant tentu cuntatu cun genti positiva a su Coronavirus, agiudendi a ndi fai bessiri a pillu asintomàticus e simmai a s'isulamentu de pressi de unu grupu, sa Diretzioni Assl Aristanis at dispostu de ndi pesai sa de duas tendas, a su costau de cussa chi giai ddui est, po fai is tamponis a is suspitus in sa pratza in antis a s'intreda a segus de s'ispidali de Santu Martinu.
Sa tensiustrutura, chi ndi at pesau in custas oras sa Protetzioni tzivili, est operativa de lunis 7 de cabudanni e at a permiti de allebiai a sa genti su tempus po abetai de fai su cumpudu nasufaringeu.
Si ponit a craru ca a intrai a sa tenda po fai su tamponi no est po totus: acontessendi de teni sìntomus respiratòrius (calentura, tussi, arrasfriori) o chi unu est abarrau acanta a unu acertau de essi fertu de Coronavirus tocat sèmpiri a s'inderetai a su mèigu de famìllia o pediatra o guàrdia mèiga, chi valutendi sa situatzioni at a cuntatai su Servìtziu de Igieni Pùblica po pediri de fai su tamponi.
Sa Direzione Assl Aristanis arregordat a totu sa populatzioni ca est de fundamentu, po regallai sa saludi pròpia e de is àterus, su rispetai is mesuras de seguresa e preventzioni, allabendi beni de si nci istesiai de is àterus assumancu unu metru, de bistiri sa mascarina me in is logus serraus o finas a s'abertu candu non fait a s'abarrai atesu s'unu de s'àteru, e s'igieni de is manus.