Sa diretora de sa Assl de Aristanis Maria Valentina Marras, cun s'agiudu de su dipartimentu de Preventzioni, at postu a disponimentu de su personali scolàsticu una e-mail dedicada a chi si bolit fai su test sierològicu po sciri si ant tentu su coronavirus - si in casu su dotori de famìllia non bolat pigai parti a sa averiguadura.
Sa e-mail chi su personali de sa scola, siant maistus o àteru residentis in provìntzia de Aristanis, depint imperai po mandai sa domanda, est custa:mario.piras@atssardegna.it.
In sa e-mail tocat a inditai nòmini e sanguanu, ita si fait de traballu, sa scola inui si traballat, e unu nùmeru de telèfunu, cumpilendi su mòdulu publicau in su situ www.asloristano.it. S'at a arriciri unu apuntamentu po fai s'esàmini in is laboratòrius de IgienI Pùblica Assl Aristanis, bia de Carducci, 35.
Marcaus ca su personali scolàsticu prima de totu depit circai su dotori de famìllia po fai su test e sceti si issu non pigat parti a su screening, si podit scriri o tzerriai a su Dipartimentu de Preventzioni cun sa mail dedicada.
Sunt giai medas is dotoris de famìllia de sa provìntzia de Aristanis chi ant arretirau su materiali po fai su test in is distretus de Aristanis, Abas-Terraba e Ghilartza-Bosa e ant giai cumentzau a fai s'averiguadura intra de is utentis issoru.