Sa Fiera de s'Artesania Artìstica de sa Sardìnnia est lòmpia a sa de 59 editzionis e at a abarrai aberta ònnia dì fintzas a su 6 de cabudani de is 10,00 a is 21,00.
Is artesanus sunt 91 e in is ispàtzius de su Tzentru Fiera de su Tapetu s'ant a ammostai e s'ant a bendi is manufatus prus bellus de s'artesania artìstica de s'ìsula, scarteddus, arricamus, oreria, ainas de imbirdi, de linna, gorteddus, mandiaris.
S'eventu assigurat su respetu de totu is normas po cuntenniri s'ispainadura de su COvid-19, e po amparai totu is abbisitadoris de su riscu de contàgiu.
Su Sìndigu Sandro Broccia, s’assessora a s'Istrutzioni Pùblica e a s'Artesania, Luisa Broccia, su diretori artìsticu, Marcello Muru, e sa Presidenta de sa cooperativa Su Trobasciu de Mòguru, Wilda Scanu, ant acrarau a is giornalistas su programma e is novidadis de s'atòbiu de prus importu in Sardìnnia po su chi pertocat custu setori (s’annu passau ia abbisitadoris sunt stètius giai 13.000).
VIRTUAL TOUR. Po sa primu borta in sa stòria sua a movi de ocannu fintzas sa Fiera de s'Artesania Artìstica de sa Sardìnnia giat a su pùblicu sa possibilidadi de fai unu giru virtuali. Difati sighendi su link www.fierartigianatosardegna.it est possìbili abbisitai de domu a manera virtuali sa manifestatzioni, castiai is prudutus e domandai informatzionis a is artesanus chi sunt in sa Fiera.
Custa piataforma, cuncordada de s’agentzia Altopiano, dd'ant fata a manera sìmplitzi siat po dda castiai de unu pc siat de unu tablet o smartphone.
In custa manera sa Fiera s'at a podi abbisitai totu s'annu e is impitadoris ant a podi pigai parti a totu is eventus chi s'ant a tramiti in streaming in su situ.