Bandu de cuncursu po sa de IV editzionis de su “Prèmiu Literàriu Giulio Angioni”.
Su tema de su prèmiu literàriu po s'annu 2020 est “Is contus me in is logus fantasiosus de s'Àteru logu; sa pandemia e is efetus imaginàrius".
S’Amministratzioni de su Comunu de Guasila, partepari cun s'assòtziu Entis Localis po is Atividadis Culturali e de Spetàculu e finantziau gràtzias a su cuntributu de sa Fundatzioni Bancu de Sardigna, at publicau unu bandu de cuncursu po sa de IV editzionis de su "Prèmiu literàriu Giulio Angioni" dedicau ocannu a is contus cun tema “Is contus me in is logus fantasiosus de s'Àteru logu; sa pandemia e is efetus imaginàrius".
Spriculendi su tema: su 2020 est stètiu s'annu de sa pandemia, s'annu innui sa genti, po su prus pipius e piciocheddus, si funt aciapaus ananti un'eventu disabetau chi at donau una scutulada a sa fitianidadi. Si funt aciapaus a bivi in unu istadu de "presoni", de isulamentu sotziali, non podendi teni cuntatus fìsicus cun is cumpàngius de scola, cun is amigus, cun is afetus, innui s'ùnica possibilidadi de si spreviai e de cuntatu cun parti de foras, in prus de is ainas tecnològicas, est stètia sa fantasia e s'immaginatzioni. Si funt serradas is gennas de is domus ma si funt abertas is mentis de is piciocheddus, chi sa fantasia issoru non tenit làcanas.
Su "Prèmiu Literàriu Giulio Angioni" po s'annu 2020 si spartzit in una setzioni sceti "Contus" spratzida a duas categorias: sa primu po is magiorennis, sa de duas po is prus pitius.