Est de una bintina de annus prus o mancu chi Arriora est nomonada fintzas po sa prantadura de sa spiga aresti, gràtzias a s'òpera de Elvio Sulas. Onni annu in is mesis de làmpadas e argiolas po 4 diis si fait s'incùngia de custa mata , seghendi-dda a manu.
“Est una protzedura chi sighit sa filosofia bio e ecosostenìbili, non strobat sa mata e permitit de lambicai su frori sa dì etotu e imbutilliai s'ollu essentziali assigurendi a su prudutu sa calidadi prus manna.
Onni annu duncas s'arrepitit custa festa de sa spiga aresti cun profumus e coloris chi prenint su logu.
Est sèmpiri una ocasioni po scoberri, contixeddus e crosidadis apitzus de custa mata aromàticas chi tenint diversas propriedadis. Agiudat su sonnu, sa respiratzioni e a si relassai.
S' idea est nàscia 20 annus fait apustis de unu viàgiu chi Elvio at fatu cun unu amigu suu in Provenza . De insaras sunt nàscias duas prantaduras de spiga aresti, una in Arriora e s'àtera in provìntzia de Viterbu.