Cenàbura, 4 de cabudani a is 17.00 in sa sala de su Consillu de su Comunu de Siamajore s'at a presentai su progetu “Parcu Monumentali de su Romànicu in Sardìnnia” – Oportunidadi de svilupu turìsticu e cundivisioni culturali.
Unu programma po avalorai su turismu culturali chi interessat 70 Comunus de sa Sardìnnia cumprèndiu Siamajore. In custa scuta si bolit sighiri cun is atividadis po amparai a avalorai sa crèsia romànica de Santu Cirìacu. Sa punna est cussa de cuncordai ocasionis de svilupu e òcupu, prusatotu intra de is giòvunus e interessai pipius, genti manna e famìllias in atividadis culturalis e de socializatzioni. A s'atòbiu ant a fueddai comenti a arrelatadoris Francesco Antonello Soro responsàbili de s'Agèntzia de Svilupu Locali “Giudicato di Arborea” nàscia de pagu e Giorgio Garau responsàbili de sa Comunicatzioni de su Programma, chi ant a ammostai is atzionis e oportunidadis chi custa initziativa at a giai.
Is personas chi ant a pigai parti podint inditai propostas e ideas po avalorai su monumentu romànicu e po afortiai su svilupu turìsticu de sa comunidadi.
A s'atòbiu podeis pigai parti totus.