Sa ASSL de Aristanis at postu a disponimentu de is mèigus de mexina generali is cunfetzionis de sierològicus po su personali de sa scola e funt po spaniai me in is seas de is tres distretus sòtziu sanidàrius de Aristanis, Bilartzi-Bosa e Abas-Terraba segundu a custa manera:
- Distretu Aristanis
In Aristanis is cunfetzionis ddas podint arretirai in sa sea de sa bia Carducci, 41, in su servìtziu Curas domiciliaris, intrendi de is 9 oras de mangianu a is 2 de meigama e de is 3 a is 5 de merii.
- Distretu Bilartzi-Bosa
A Bilartzi is cunfetzionis si podint arretirai in su Poliambulatòriu apustis de s'essi marcaus a su nùmeru 0785.560301, mentras in Bosa tocat a cuntatai a in antis su nùmeru 0785.225352.
- Distretu Abas-Terraba
In su distertu de Abas-Terraba sa spaniadura si fait apustis de s'essi postus de acòrdiu cun is referentis distretualis Salvatore Ghiani po Terraba e Peppino Mallocci po Abas.
Personali scolàsticu: comenti prenotai su test sierològicu
Totu su personali scolàsticu, maistus e non maistus, de is scolas pùblicas, istadalis e no istadalis, paritàrias e privadas, chi bolint fai su test sierològicu - a indonu e voluntàriu comenti narat su Ministeru de sa Saludi - podit cuntatai su mèigu insoru de famìllia chi at a marcai logu, oràriu e sea po fai su test.
Abisòngiat a s'arregordai ca a diferèntzia de su tamponi, chi narat ca ddui est s'infetzioni, su test sierològicu scòviat chi is sugetus funt intraus a cuntatu cun su virus, scerendi is anticorpus chi fait su sistema immunitàriu. Incapitendi sceda positiva de s'esàmini sierològicu s'at a fai su tamponi nasu-faringeu. A pigai parti de su spricullu sierològicu de su personali scolàsticu est duncas de importu po protegi insoru e is àterus de is arriscus de s'atacai apari sa maladia e po fai inghitzai sa scola in seguresa.