Est sa primu borta in su 1975 chi sa scuadra de Mòguru si iscrit a sa FIPAV, cun su presidenti Tonino Maccioni e s'allenadori Valentino Broccia. A s'inghitzu ddui fiat sceti sa scuadra de is òminis, in su 1978 nasciàt sa primu truma de is fèminas.
Su càminu no est stètiu sìmplitzi po custu assòtziu sportivu de sa Marmilla. De arremonai in is annus 90 sa promotzioni in C2 de is òminis, sa presèntzia longa in sa sèrie D de is fèminas e su bantu de àiri crèsciu unu giogadori de importu mannu comenti a Alessandro Ardu, ca po annus e annus at pigau parti a is campionaus de sèrie A1 e A2. Importanti est fintzas sa funtzioni sotziali e de agregatzioni chi sa Pallavolo Mòguru sighit de sèmpiri, piciocheddus e piciocheddas ant agatau in custu assòtziu unu logu inui crèsciri in su sport e in sa vida.
A dì de oi s'assòtziu bantat prus de centu iscritus chi giogant in totu is categorias, In su 2015 sa pallavolo Mòguru at afestau is 40 annus de atividadi e at fatu una festa manna inui ant pigau parti giogadoris e giogadoras de oi e de ariseu de custa scuadra .