Su bandu “Oristano per le imprese”, chi cuncedit a is impresas e professionistas aristanesus sgràvius finas a 300 èurus po sa TARI 2020, intrat in sa Fasi 2.
Su Comuni de Aristanis sterrit is sgràvius in prus de is impresas e a is professionistas chi ant suspèndiu in totu s'atividadi po nexi de su Covid-19, finas a cussus chi ant suspèndiu in parti s'atividadi po nexi de s'apretu sanidàriu.
Chi podit intregai sa dimanda
Podint intregai dimanda is impresas (ditas individualis, impresas artesanas e sotziedadis), titularis de Partida Iva e iscritas in sa Càmera de Cummèrciu, e is professionistas titularis de Partida Iva, cun sea operativa in Aristanis e chi, intra de su 5 de martzu de su 2020 e su 3 de maju de su 2020, apant suspèndiu s'atividadi po efetu de is normas po non si spaniai s'epidemia de su COVID-19.
Is rechisius
Is impresas chi pedint de intrai a su benifìciu in su 2019 non depint ai tentu unu faturau prus artu de 400 mila èurus, mentras su lìmiti de faturau po su 2019 stabiliu po is professionistas (cun partida Iva) est de 50 mila èurus. Su benifìciu si podit aciungi cun su contributu de 600 èurus postus in contu in su Decretu “Cura l’Italia” de su guvernu natzionali in agiudu de su sistema produtivu, cun is bonus alimentaris e cun is provedimentus postus in contu cun is Leis regionalis.
Is benificiàrius s'ant a scerai segundu a duas prioridadis de assinnamentu: prioridadi 1 po chi at suspèndiu totu s'atividadi; prioridadi 2 po chi at suspèndiu in parti s'atividadi po nexi de su COVID-19. Su Comunu at a apurai a campioni is decraratzionis chi ant lassau is sugetus amìtiu a su benifìciu.
“Su contributu cuncèdiu, totu in una borta, est stabiliu in sa mesura prus arta de 300 èurus e comenti si siat finas a arribai a sa TARI chi si depit po s'annu 2020 candu custa arresurtat essi prus bàscia s'at a bogai de su còmputu de totu s'importu de su Tributu TARI chi si depit po s'esercìtziu 2020 - ponint a craru is Assessoris Angelo Angioi e Maria Bonaria Zedda -. Candu su sugetu chi fait rechesta tenit prus de una sea operativa acapiada a impitus TARI diversus at a podi benificiai de is 300 èurus po sa primu sea operativa e de unu 50% in prus de su contributu sceti po una segunda sea operativa".
Scadèntzia e maneras de intregai dimanda
Is dimandas s'ant a podi intregai de su 15/09/2020 finas a mesunoti de su 31 de su mesi de ladàmini de su 2020.
S'istàntzia si depit intregai a su Comuni feti cumpilendi su mòdulu aposta chi at a essi a disponimentu in sa pògina maista de su situ istitutzionali de su Comuni de Aristanis.
Po intregai sa dimanda abisòngiat a intrai a sa procedura cun SPID, su Sistema Pùblicu de Identidadi Digitali o cun Carta Natzionali de is Servìtzius CNS.
Informus
Po ndi sciri de prus unu si podit inderetai a is ufìtzius comunalis: 0783 791356 e a posta eletrònica a s'indiritzu: oristanoperleimprese@comune.oristano.it.