Contributus servìtzius educativus primu infàntzia e scolas de s'infàntzia paritàrias. Dimandas aintru de su 14 de cabudanni.
Is gestoris de is servìtzius po sa primu infàntzia e is scolas de s'infàntzia paritàrias tenint tempus finas a su 14 de cabudanni po intregai is dimandas po intrai a is contributus po su traballu segundu a cantu disponit su D.Lgs. 65/2017- DGR n. 35/33 de su 9/07/2020 e DGR n. 39/23 de su 30/07/2020.
Sa punna est cussa de assegurai sa cobertura de is costus tentus po mori de s'apretu de su Coronavirus po is annus educativus/scolàsticus 2019/2020 e 2020/2021, po mori de ai serrau in antis de su tempus is servìtzius in custu annu educativu/scolàsticu e in sa bidea de torrai a atacai is servìtzius in s'annu educativu/scolàsticu 2020/2021. Pròpiu in s'idea de torrai a atacai is servìtzius si ponint in contu règulas chi iant a podi inferri a malu modu in sa situatzioni econòmica de is aziendas, comenti a limitai su nùmeru de pipius chi fait a iscriri in unu servìtziu/scola, sa crescida numèrica de su raportu intra de educadori e/o maistus e is pipius e su nùmeru de su personali ausiliàriu chi abisòngiat a assegurai sa limpiesa de is localis. In prus, sa pandemia at ingendrau un'aumentu de costus de funtzionamentu innui s'aciungint cussus de adeguamentu de is spàtziu a disponimentu, rispetendi sa normativa in vigori in matèria de seguresa.
Is destinatàrius de is contributus funt is sugetus, chi funt in su territòriu comunali o de s'Unioni de is Comunus, in funtzioni me in is annus educativus/scolàsticus 2019/2020 e 2020/2021, gestoris de is servìtzius educativus primu infàntzia 0–3 annus, in gestioni dereta o indereta comunali, cunventzionaus e non cunventzionaus (asilus nius, micronius, nius aziendalis e setzionis "primavera") e is scolas de s'infàntzia in possa de su reconnoscimentu de sa paridadi, cunforma a sa L. 62/2000.
Totu s'importu assinnau cun is delìberas de Giunta regionali s'at a spratziri intra de totus is sugetus gestoris de is servìtzius beneficiàrius de su contributu in proportzioni a sa mèdia de su nùmeru de is pipius chi frecuentant is servìtzius me in is annus educativus/scolàsticus 2019/2020 e 2020/2021.
Is dimandas, chi tocat a cumpilai in su modellu a disponimentu in su situ istitutzionali, s'ant a depi intregai a pec a s'indiritzu istituzionale@pec.comune.oristano.it - protocollo@comune.oristano.it o a paperi a s'Ufìtziu Protocollu postu in Pratza de Eleonora 44, aintru su 14 de cabudanni de su 2020.
Su Comunu at a fai cuntrollus, finas a campioni, asuba de sa beridadi de is decraratzionis sustitutivas lassadas po intrai a su finantziamentu, cunforma a su DPR n. 445/2000.
Is verìficas po rispetai su princìpiu de su finantziamentu dòpiu de is spesas de gestioni chi ant tentu is scolas de s'infàntzia paritàrias ddas at a fai sa Regioni in s'àmbitu de is cuntrollus asuba de is arrendicontus chi pertocat sa cuncessioni de is cuntributus chi funt in sa L.R. n.31/1984 art. 3 lìt c).
Po informus po is servìtzius Primu Infàntzia (0–3 annus) fait a s'inderetai a primainfanzia@comune.oristano.it, telèfonu 0783791297, de su lunis a sa cenàbura, de is 9 oras a mesudii. Po is Scolas de s'Infàntzia Paritàrias (3–6 annus) si podit scriri a pubblicaistruzione@comune.oristano.it o tzerriai a su nùmeru 0783 – 791238, de su lunis a sa cenàbura, de is 9 oras a is mesudii.