S'abisòngiu de sànguni no andat in vacàntzia, sa solidariedadi prus pagu. Po custu sa ATS-ASSL de Aristanis invitat a totu sa genti in saludi a donai su sànguni in su Tzentru Trasfusionali de Aristanis o a pigai parti de is atobiadas de arragorta chi si faint a candu in unu logu a candu in unu àteru me in is tzentrus de sa provìntzia a manu de pari cun s'AVIS.
Comenti ònnia istadiali, peus immui cun su COVID-19, si torrat a aparai ocannu puru in Sardigna su problema de s'ammancu de su lìcuidu emàticu, chi sunfrit de is pagu donatzionis po mori ca totus funt in vacàntzias e, de contras, de unu fabisòngiu prus mannu essendi-nci prus turistas. Mancai si fetzat una programmatzioni de is provistas, finas su Tzentru Trasfusionali de Aristanis tenit abisòngiu de s'agiudu de totu sa populatzioni po assegurai de sighiri a fai beni is atividadis sanitàrias chi abisòngiant de sànguni.
S'apellu est po totu cussa genti magiorenni, mancai chi siat fàbica o portadora de anemia mediterrànea, chi pesat assumancu 50 chilus e in saludi.
Po donai su sànguni tocat a s'inderetai a su Tzentru Trasfusionali de su spidali "San Martino" de Aristanis, abertu de su lunis a su sàbudu, de is 8:00 a is mesudii, o pigai parti a is arragortas in prus chi si faint a coa de cida partepari cun s'AVIS.
A su Tzentru Trasfusionali de Aristanis fait a intrai sena de si fai annotai, mancu nau si bolit cun mascarina chi protegit e arrispetendi is mesuras de seguresa, casi ca in sa sala po abetai s'assegurat su de abarrai atesu s'unu de s'àteru. Si consillat, candu fait, de non s'aparai totus a is 8:00 - s'ora chi ddui andat prus genti - ma me in is oras afatantis de su mangianu, aici de non si fai trigai meda.
Po is arragortas in prus, chi si faint cun s'autoemoteca o me in is seas de s'AVIS, fait a s'inderetai a s'AVIS locali po si fai annotai e po non s'acomunai totus impari.