Su palatzu portat su nòmini de su tìtulu nobilliari de Don Damiano Nurra Conca; su tìtulu de Marchesu de Arcais si dd'iat giau su re sabàudu Carlo Emanuele III, cun diploma de su 23 de austu 1767. Arcais ndi beniat de su nòmini de duas pischeras Arcai Mannu e Arcai Pittiu, chi s'agatànt acanta a Zerfaliu e chi fadiant parti de s'asienda immobilliari de su marchesu. Su dinarosu nòbili aristanesu candu iat scìpiu de su progetu de populamentu de sa penìsula de su Sinis de is sabàudus, po àiri una defensa prus forti de su Gulfu de Aristanis ameletzau dae is bàrbarus, iat domandau a su viceré de Sardìnnia, Alfieri di Cortemiglia, de infeudai su territòriu prupunendi de pagai 216 mila francus de Piemonti.
Su palatzu, residèntzia de Don Damiano Nurra Conca, ndi dd'iant pesau in su cursu Umberto, in su coru de sa tzitadi e gràtzias a sa bontadi sua si depit sa costruidura de una crèsia e unu cunventu donau a s'òrdini de is Carmelitanus su 27 de abrili 1782.Una iscritzioni in latinu torrada a agatai in sa crèsia de su Càrmini inditat su logu inui iant interrau Don Damiano Nurra d'Arcais su 15 de làmpadas de su 1790. Su fàbricu presentat una faciada sèria; peroa si podint biri balconis semicircularis chi afrorìgiant su pianu nòbili. Immoi su palatzu est de propriedadi de s'Amministratzioni Provintziali de Aristanis, chi dd'at torrau a fai a nou de pagu tempus e aintru ddui faint manifestatzionis e atividadis culturalis.