Est acabbada ariseu 19 de austu a is 5 de merii s'initziativa po ndi pinnicai s'àliga chi s'est ammuntonada in Seu. Sa giorronada chi at cuncordau s'Àrea Marina Protègida, partepari cun s'assòtziu "Sea scout", in s'àmbitu de su progetu "Campuseu" at pertocau 18 personis.
Is voluntàrius ant pinnicau 12 sacus mannus de àliga, po su prus pràstica e una parti pitia de imbìdriu, liàuna e àtera àliga chi non fait a seberai, in totu giai 150 chilus.
Me in s'initziativa no est ammancu su giogu chi at tocau e fatu spassiai is piciocheddus de su progetu "Campuseu". Is organizadoris ndi ant pesau unu batellixeddu chi, tirau cun una funi, faiat s'anda e torra intra de sa spiàgia e su gommoni chi si nci at ingortu is sacus de àliga.
"Gràtzias a totus, a su Cnr chi at pigau parti, a "Sea scout" chi ndi at betiu is piciocheddus. Fatu totu!" decrarat su diretori de s'Àrea Marina Protègida, torrendi de sa giorronada.
Ariseu s'initziativa est torrada paris a s'arribu in su Sinis de Giancarlo Gusmaroli, ingennieri ambientali chi est fadendi su fùrriu de sa Sardigna in "kayak". Gusmaroli, ativu meda in s'arretza sociali, est documentendi dii cun dii s'aventura sua, movendi de sa dii chi est partiu de s'ìsula de La Maddalena. In prus Gusmaroli est fadendi aintru de "#messaggionelkayak" intervistas curtzas a unus cantu personàgius chi at atopau in su caminu suu. Is intervistaus de "#messaggionelkayak" ant torrau sceda a custa pregunta: "Chi fiast Mediterràneu, su mari chi tui connoscis, ita iast a nai a nosu, is òminis?". Finas su diretori de sa "Amp" Massimo Marras at donau sa sceda sua, chi fait a dda biri castiendi su prefilu de "facebook" de Giancarlo Gusmaroli "https://www.facebook.com/g.gusma"
Su diretori de s'"Amp" Massimo Marras e is operadoris de su "CReS" ant a acumpangiai Gusmaroli in una bìsita in su Tzentru de recùperu de tostoinus.
Incapat a s'acabbu de austu o is primu de cabudanni s'at a torrai a fai s'initziativa po ndi pinnicai su muntoni de àliga in Maimoni e chi ant sinnalau me in is ùrtimu oras is operadoris de Àrea Marina Protègida.