Apustis s'acorru fortzau de custus mesis finas in Mòguru ant atacau su 17 de su mesi de argiolas cun is fainas de su Servìtziu Tzivili Universali chi at tocau otu piciocus chi ndi arribant de is biddas acanta.
Is progetus propostus funt duus, unu chi pertocat su setori de Assistèntzia cun su progetu “RelAzioni di Comunità”, e s'àteru chi pertocat su setori de su Patrimòniu Stòricu, Artìsticu e Culturali cun su progetu “Le Storie raccontano il mondo”.
Su progetu “RelAzioni di Comunità” tenit sa tarea de fai mellus sa vida de is bècius e de personis cun disabilidadi, favoressendi is relatzionis sotzialis cun is àterus de sa comunidadi.
Su progetu “Le Storie Raccontano il Mondo”, intamis, tenit sa tarea de fai mellus s'intrada a is servìtzius a totu is categorias de impitadoris e favoressi su svilupu de is cumpetèntzias me in is fasis de istùdiu po is piciocus, in prus de valorizai su patrimòniu identitàriu de sa comunidadi moguresa.
Is piciocus sceberaus cun unu bandu e su collòchiu afatanti funt: Claudia, Daniele, Francesca, Giada, Ilaria, Samuele, Sonia e Roberta e ant a circai de passai su tempus su mellus chi fait, cun is pipius, piciocheddus e bècius cun fainas de giogu, de arrecreu e assistentzialis, circhendi de intzertai a su mellus is tareas propostas cun is duus progetus e de ndi aciungi nous.
Cunsiderendi su tempus de pandemia chi s'ingìriat e chi seus bivendi dii cun dii s'at a circai de arrispetai e passai is diis sighendi in normas nobas de seguresa chi ant bogau cun su D.C.P.M. e fadendi-ddas arrispetai a is impitadoris interessaus.
A is boluntàrius de su servìtziu tzivili: fadei traballu bellu.