Sàbudu 8 de austu "Arrùbia" est furriada a domu. Piscadoris de sa cooperativa "S'ena arrubia" - a chi depit su nòmini suu - si fiant acurtus a dda agiudai su 30 de maju passau. Arraghendi po ai ingrùtiu plàstica, s'esemprari de tostoinu birdi ddu ant sanau is operadoris de su Tzentru de recùperu de su Sinis. Is cunditzionis suas non parriant giai de insaras lègias meda. Sanada in pagu tempus, dda ant castiada po caudela in su CRES finas a sàbudu.
Su tostoinu birdi, una ispècia chi bivit de su generi "Chelonia", spicat de totu is àterus tostoinus de mari po sa coratza chi est a cuatru scudus a ladu. Su stili suu de bivi est sìmbili a cussu de sa prus nodida e comuna "careta careta", ma spicat po sa capassidadi de si movi, me in is migratzionis suas, tretus longus finas de 2000 chilòmetrus.
Sa presèntzia sua dda ant atestada po su prus in su Mediterràneu sud-ocidentali e pagu bortas in Itàlia. Biu ca est un'eventu speciali meda, s'ora de dda ai lassada scapa is operadoris de su CRES dda ant documentada cun ripresas subàcueas. Sa motovedeta CP 307 de sa Capitaneria de portu de Aristanis at donau una manu de agiudu a totu s'operatzioni. Ant pigau parti a s'eventu su Capitanu de frigada Antonio Frigo, Roberto Raga Gadea, alcalde de Riba-roja del Túria, unu comunu ispanniolu de sa comunidadi autònoma de Valèntzia, òspiti de su diretori de s'Àrea marina proteta Massimo Marras; Andrea Abis, Sìndigu de su Comuni de Crabas e Manuela Pintus, Sìndiga de su Comunu de Arborea, po dda ai aciapada in territòriu suu. Su CF Antonio Frigo e sa Sìndaga Manuela Pintus ant atèndiu a dda lassai scapa.