A metadi de obrili is ispertus de su Tzentru de recùperu de su Sinis e de s'àrea marina protègia dd'iant arrecuperada. Pio unu tostoinu careta careta fiat aiuntru a una retza po piscai e fiat acanta a s'allupai; apustis de tres mesis e prus, chi is circadoris dd'ant castiada, su 5 de austu est torrada a domu.
S'eventu dd'ant organizau aici:
-prus o mancu a is 18 est stètiu possìbili intrai in s'Osservatòriu de su tzentru de educatzioni ambientali e marina de Santu Giuanni, connotu comenti a "sa cupola", innui is operadoris ant ammostau comenti si fait su traballu de recùperu de is tostoinus;
- a pustis si seus trantzius a peis o in trenu - in s'istmu de Santu Giuanni e ingui in cussa spiàgia pitichedda eus liberau Pio; si seus postus a manera de arrispetai is distàntzias de siguresa in custu anfiteatru naturali fatu de arrocas po pòdiri biri sa liberatzioni.
Su tostoinu, longu 47 cm e de su pesu de 11 chilus, fiat capitau po sorti in una retza de Pier Paolo Manca, piscadori crabarissu, in su mari de "Torre dei Corsari". Su piscadori e is collaboradoris suus iant tzerriau luegu is operadoris Cres e Amp, po si dda giai a castiai. Sa salvesa de Pio si depit duncas a custu piscadori e a is collaboradoris suus. Pio difati non iat a èssiri bìvia si dd'iant lassada luegu in mari; in su momentu chi dd'ant agatada parriat prus morta che bia. Po èssiri abarrada meda asuta de àcua at tentu problemas a livellu de is purmonis, problemas chi sunt arresurtaus in is esàminis fatus in sa clìnica veterinària “Due mari” de Aristanis.