Su programma "Progetus de s'istadi po minoris 2020" inghitzat su 6 de austu.
Su 6 de austu atacant is fainas de s'assòtziu culturali "Libriamoci" in s'àmbitu de su programma "Progetus de s'istadi po minoris 2020", nàsciu po donai prus balori a is atividadis in su territòriu de Crabas.
"Libriamoci" s'est agiudicada su cuntributu po ndi pesai in su mesi de austu de su 2020 fainas de giogu e de arrecreu e tzentrus de istadi, apustis de ai balutau is rechisius.
Me is in motivatzionis de su progetu, cun tìtulu "A sa scoberta de su Sinis", is piciocas de "Libriamoci" iscriint ca "nascit de su disìgiu de favoressi una proposta chi pòngiat in mesu de su interventu educativu e sotziali suu, su pipiu, andendi a sa scoberta de is aspetus prus de importu de sa cultura nosta locali, de su territòriu e de is traditzionis". "A sa scoberta de su Sinis" tenit comenti a punna cussa de fai connosci su prus chi fait su Sinis a is pipieddus crabarissus. Po pipius e piciocheddus de 3 a is 17 annus, su progetu movit cun leturas curtzas, contus chi faint parti de sa traditzioni e fainas de giogu de esperièntzia.
Is otu atobiadas si faint in austu, 16 oras in totu, in pratza Azuni e in su parchetu de sa bia de Colombo. Ses de custas ddas ant a incurai is piciocas de "Libriamoci", funt po pipius de 3 a is 10 annus e chistionant po su prus de territòriu. Is àterus duus invècias s'ant a dedicai a s'arti e ddas at a incurai sa maista de arti, Ivana Loi. Ant a pigai parti finas s'assòtziu culturali e folclorìsticu “A sa crabarissa” e s'assòtziu culturali “Schizzi d’arte”. Is fainas s'ant a fai agiudendi-sì de imàginis fotogràficas, testus scritus e a figuras, materiali de recùperu e prodotus localis.
S'at a inghitzai su 6 de austu de is 6 a is 8 de merii in pratza de Azuni innui ddui at ai "Mont' 'e prama e is gigantis", apustis de una letura animada curtza, innui is chi faint parti podint fai onniunu una mascara sua.
Martis 18 de austu de is 10 a mesudii in su parchetu de sa bia de Colombo "Tharros e is bividoris antigus suus" at a torrai fai bivi su Sinis comenti a terra de conchista. Torrendi a bivi s'àiri de chi at bìviu prus de duamilla annus fait, "Libriamoci" at a proponni unus cantu giogus antigus romanus de fai a scuadras.
Mèrcuris 19 de austu de is 5:30 a is 7:30 de merii in pratza de Azuni nci at a ai un'atobiada dedicada a s'arti e po is pipius e piciocheddus de 8 a 17 annus, si ndi at a incurai s'assòtziu "Schizzi d’arte".
Giòbia 20 de austu de is 6 a is 8 de merii in pratza de Azuni "Su costùmini" at a incarrerai, a is piciocheddus chi ascurtant, a is traditzionis gràtzias a aprofundamentus apitzus de particularis e crosidadis de su costùmini crabarissu.
Lunis 24 de austu de is 5:30 a is 7:30 in pratza de Azuni un'àtera atobiada dedicada a s'arti e po is pipius e piciocheddus de 8 a 17 annus, si ndi at a incurai s'assòtziu "Schizzi d'arte".
Martis 25 de austu de is 10 a mesudii in su parchetu de sa bia de Colombo nci at a ai "Is spiàgias", a aciapai su scussòrgiu e a torrai a fai sa costa de su Sinis, carculendi de prus sa sensibilizatzioni de is pipius avatu a sa tutela de su mari e de sa spiàgia de cuartzu.
Giòbia 27 de austu de is 6 a is 8 in pratza de Azuni nci at a ai sa caminera sensoriali "Scoberreus impari su Sinis cun is 5 sensus".
Lunis 31 de austu de is 10 a is mesudii in su parchetu de sa bia de Colombo s'initziativa "Su stani 'e pauli 'e sali" at a fai de meri me in is atividadis de is esploradoris pitius circhendi arrastus arreu in su parchetu.
"Seus prexaus de ai dedicau custu dinai a is assòtzius - decrarat Alessandra Spanu, assessora a is polìticas sotzialis, sanidàrias e assistentzialis - e duncas podi donai balori a s'operau insoru in su territòriu de Crabas".